A zawnin TNT an chak

Mizo hlanga an khelh avangin Thutak Nunpuitu Team hi dah hniam ngawt theih an ni lo, tualchhung player hlanga nomawi lo chawi tawhtu TNT hian Ningani zan khan Anastasia Electric Veng chu 25-17, 25-23, 13-25, 25-23 (3-1) in an hneh.

LPS Arena, Falkland Vengah TNT hian inrintawkna sang tak nen an khel. EverHome Pro Volleyball League an match hmasa zawkah an chak bawk avangin an boruak pawh a fuh.

Mizo blocker ṭha Zosangzuala (Lalmama) chuan Kuriz Player of the Match lawmman a dawng a, point 17 hmuin ṭum hnih chiah a tisual. A hnunga a awm laia lehlam vuak dangtu ber K. Zodingliana'n point khat hlohin point riat a hmu a, a vuak lamah TNT tan Vanlalṭanchhana'n tum 20 hlap tlain point 13 a paih a, Saidingpuia Sailo chuan vawi 10 vaw tlain point ruk a hloh.

Set hmasa pahnih an lak zawn hnuah TNT an tlahniam hret; set linaah insiam thar lehin inelna boruak sangah 23-23 a nih laiin Valbuanga leh Zodinga'n an vaw tla zawn. League an khelh hmasak berah Tuichangral hneh lo nghal mah se Hunthar leh Anastasia hneh zawnin kawng dik an zawh mek.

Sihphir an hneh loh ṭum ang bawkin Electric Veng club hi set hmasa pahnihah an insiam rem nghal mai lo a, set thumna hneh taka an awpbeh hnuah an tlo zui zo lo leh a, vawi thum an khelh tawhah a vawi hnih nan an tlawm.

Yougank Baliyan-a'n vawi 24 vaw tlain point riat a hloh a, amah chauh ni loin Anastasia rinrawl dang Laldensanga'n ṭum 12 a hlap tla a, Laldinsanga'n vawi sarih vaw tla ve thungin point li ve ve an hloh a, Tuichangral an hneh ṭuma an khelh dan an pha lo.

Electric Veng team tan Lalrinawma'n point sarih hmuin ṭum li a tisual a, hloh nei loin Helly Vanlalliana'n point nga a hlawh chhuak bawk a; an khelh hnuhnun ber aiin che ṭha ve ve mah se chakpui nan a tawk zo lo.

Team parukin vawi thum ṭheuh an khel kim ta chiah a, TNT-in hmahruaitu Tuichangral nih rualin zan zawnin an khelh a ngai a, nizan khan Sihphir an hneh a nih chuan semifinal lut ngei tur dinhmun ṭhaah an inhung ang, result kan hre hman lo thung.

Zaninah semifinal lut thei hniam bera awm chungin Anastasia an inlan ve leh dawn a, anni ang bawka insiam ṭhat mamawh Khawbel nen an inhmachhawn dawn a, chak a pawimawh dawn hle a ni.