Ligue 1 a nep lo - Enrique

Paris Saint Germain manager Luis Enrique chuan Ligue 1 chu dah hniam a remchang lo tih a sawi a, miten 'Farmers League' tia an sawi chu a dik lo a ni tih an lantir zel dawn tih a sawi bawk.

Paris club hian Champions League final an lut fel tawh, final an luh theih nan hian Premier League team ṭha Manchester City, Liverpool, Arsenal leh Aston Villa te an hneh thei, an kawng a awlsam lo hle.

Enrique chuan, "Miten an ngaihdan hrang hrang an sawi ka hre ṭhin, kei pawhin ngaihdan ka nei ve bawk. European league lian zingah Ligue 1 hi dah hniam a rem lo, a chhan chu tuna kan thlen chin hi en mai tur a ni," a ti.

Inter Milan nena final khelh a duh zawk thu sawi zuiin Enrique chuan, "Final luh hrim hrim kha ka duh, kan khingpui tur erawh Barcelona ni loin Inter Milan an ni kha a lawmawm zawk, a chhan chu Barca hmachhawn tura rilru siam ka duh lo," tiin a club hlui a la hmangaih reng thu a sawi.

Paris club hian Ligue 1 nomawi an humhim chiang tawh, zanin dar 12:30-a Montpellier an lenchilh hunah pawh player inkhel tam vak lote tan inlan theihna remchang a nih ngei a rinawm.

French champion nih ringawt hi PSG neitu lam lawmna a ni lo thung. French Cup final an lut tawh bawk a, an duh ber erawh Champions League nomawi a ni dawn - Inter Milan hneh chunga UCL title lak ngei an tum ang.