Chelsea hmachhawn tur Real Betis

Europa Conference League final khel turin Chelsea an tlang a, an mikhual Djurgarden chu 1-0 in an hneh. Sweden ramah 4-1 in an lo va chak tawh a, inkhel pahnih belhkhawmah Blues hi 5-1 in an tlang.

Ningani zan Stamford Bridge-a inkhelah Enzo Maresca-a'n player a siksawk nasa hle, kar tawpa Premier League match kheltu player 10 ngawt a thlak a, inthlak kual nasa viau mah se Kiernan Dewsbury-Hall chuan goal awmchhun a khung.

Blues tana bul ṭan zingah kum 16 leh ni 200 mi Reggie Walsh a tel a, Chelsea tana European match-a inkhel bul ṭan thei naupang ber record a siam.

Chelsea hian a vawi riat nan European football final an khel dawn a ni a, kum 2021 khan Thomas Tuchel kaihhruaina hnuaiah Manchester City hnehin Champions League nomawi an chawi, a hnu lama final an khelh lehna hmasa tur a ni.

Blues manager Enzo Maresca chuan, "Tunah hian mellung pawimawh leh danglam tak mai phun theihna remchang kan nei dawn a ni a, chuvangin club chhunga mi zawng zawng tan hun pawimawh a ni ang.

"Conference League hian chak duhna thinlung min pe a, nomawi chawi châka tuihalna min pe bawk, tun season kan hman mek duhawm taka khar turin kan champion a ngai dawn," tiin nomawi chawi a tum hle.

Chelsea hian UCL leh Europa League nomawi an chawi tawh a, Conference League champion an nih leh chuan European football inelna sang pathuma champion vek thei awmchhun an ni ang.

Semifinal lehlamah Real Betis leh Fiorentina te 2-2 in an inhnehtawk, an intawn hmasakin Spanish club hi 2-1 a an chak avangin belh khawmah 4-3 in an tlang - Manuel Pellegrini enkawl team hian final an khel dawn a ni.

Real Betis tan hian Antony chuan goal khat a khung. Manchester United aṭanga loan hmanga an hawh Antony hi Betis tan a ṭangkai thei hle a, final an luh theih chhan pakhat a ni, La Liga lamah a khel ṭha ṭhin bawk.

Conference League final an lut a, forward Antony chuan lawm avangin a mittui a dang zo lo. Brazil international chuan, "Ka hun harsa paltlang kha ka chhuungten min hriatpui, ka unaute, ka nupui leh ka nu ngei pawh a ṭap ka hmu ṭhin.

"Pawn lam aṭanga diriamna leh sawiselna ka dawng nasa em em a, mi ṭhenkhat chuan inkhel ve tlak tawh lo ang hial ten min sawi ṭhin. Khatiang hun ka tawn lai pawh khan ka chhungte chuan min tawrhpui a, min kalsan ngai lo," tiin a sawi.