Serie A ngaihtuah hun a ni - Inzaghi

Champions League final lut hlim Inter Milan chuan Pathianni zan dar 9:30 hian Serie A match khel turin Torino an lenchilh dawn, coach Simone Inzaghi chuan an tan Serie A chauh ngaihtuah hun a ni tih a sawi.

Inter Milan tan Serie A nomawi an kawl lai humhim turin an hmabaka chak vek ringawt a tawk tawh lo, an chunga awm Napoli an chetsual tel a ngai tawh dawn, hna a awlsam dawn lo hle.

Inzaghi chuan, "Chanpions League, Serie A leh Coppa Italia zingah Inter Milan chuan duh kan thlang ngai lo, eng inelna pawh ni se la theihtawp kan chhuah a, kan ngaipawimawh em em vek.

"Tunah chuan Serie A ngaihtuah hun a ni a, kan theih dana ṭha berin kan khel ang," a ti a, a player ṭhate hahchawlhtir a tum lem lo. Theih ni se chuan Serie A leh UCL nomawi lak kawp ngei a duh ang.

Inter Milan hi an chak a nih chuan an chunga awm Napoli chu an nihrual ang a, an intawn tawhnaah sulhnu an neih ṭhat zawk avangin hma an hruai ang. Mahse, Antonio Conte naute an inlan zui ve leh dawn a, an hmahruaina an lalet leh nghal thei.

Napoli hin Pathianni zan dar 12:15-ah Genoa an mikhual dawn, table mawng lama awm mek team lakah Conte naute tan point thum hlawh chhuah a harsa lo tura ngaih a ni a, an hmabak pathumah an chak ve chuan midang result ngaihchan tel ngai loin an champion ang.