Tlangval vanduai Kylian Mbappe

Real Madrid a pan tirhah beisei a phak loh avangin Kylian Mbappé sawisel nasa mah se, mimal takin season a hmang ṭha hle - Barcelona laka hattrick a siam kha tun season-a goal 39 a khungna a ni a, heti zat goal khung tur hian match 53 bak a mamawh lo.

La Liga bikah match 31 khela goal 27 khungin top scorer a ni mek. Mahse, Paris St-Germain chhuahsan a, ropui duha Real pantu striker hi a season hmasa berah nil thei dinhmunah a ding mek.

A chhuahsan tak PSG erawh treble champion thei dinhmunah an ding thung! El Clasico-ah meuh hattrick a siam chungin a tlawm zawkah an ṭang a, World Cup final-a hattrick siam chungin a tlawm zawkah a lo ṭang tawh bawk!

Real hian tun season-ah Barca an ngam lo hle. La Liga an intawn hmasak zawkah 4-0 ngawtin an tlawm tawh a, Spanish Super Cup final-ah 5-2 in an ngam lo a, Copa del Rey final-ah 3-2 in an tlawm bawk.

Barca hian 1982-83 season khan El Clasico match liah hnehna an lo chang vek tawh a, khami hnuah tun hi season khat El Clasico-a match li an chak leh theih hmasak ber a ni - Pep Guardiola khan a El Clasico match hmasa pangaah a chakpui a, mahse, season khatah a ni lo thung.