Mizoram team-in Chhattisgarh an thleng

Swami Vivekananda U20 Men's National Football Championship khel turin Mizoram team chuan Pathianni khan Aizawl an chhuahsan a, inelna neihna hmun tur Narainpur, Chhattisgarh hi nizana thleng tura ngaih a ni. Mizoram team hi coach Lalrindika Hmar, Venghnuai leh manager Lalnunsanga, Bethlehem ten an ho a ni.

Mizoram Football Association chuan MFA Office-ah thlahna leh fuihna hun a hmang a, MFA president Lalnghinglova Hmar chuan, "Inelna hi huaisenna nen inhmachhawn tur a ni a, Mizoram tana feh chhuak in ni tih hria a ṭha. Mizoram tan chauh ni loin nangmahni tan pawh football inkhelh zelna turah a pawimawh a ni," tiin player-te a fuih a, nomawi nena rawn haw turin a chah.

Mizoram team hian MFA assistant secretary Lalbiakzuala kaihhruainain thla khat chuang RG Stadium-ah training an nei a, inbuatsaihna an nei ngawrh hle. Manager leh coach bakah hian physio Lalengkima (ITI Veng) ten Mizoram team hi an kaihruai dawn a ni.

May 14, Nilaini hian Mizoram hian match hmasa berah Maharashtra an hmachhawn dawn. U20 NFC hi thla liam ta April 12, Inrinni aṭang khan khelh ṭan a ni tawh a, Mizoram awmna group-ah hian Maharashtra (May 14), Himachal Pradesh (May 16), Tripura (May 18) leh Jharkhand (May 20) te an awm.

Nikum khan Mizoram hian semifinal an thleng a, Delhi lakah an vanduai. Chanmari FC tana khel ta Lalthankima (Thathana) chu best player-a thlan a ni. Kuminah pawh Mizoram hi team ṭha zinga tel tura ngaih an ni.