Khelo India Youth Games: Boxing-ah Samuel-a'n semifinal a lut

Khelo India Youth Games 2025 boxing-ah Bawngkawn Brigade rawlthar Samuel Zadengin semifinal a lut a, vawiin hian Himachal Pradesh boxer nen final khel tur zawnna neih a ni ang.

Inelna hi Bihar Patna-ah neih a ni a, Mizoram aṭangin Samuel bakah TC Malsawmkimi (Kg 48), North Vanlaiphai te an tel a, Malsawmkimi erawh quarterfinal-ah Rajasthan boxer lakah a vanduai thung.

Khelo India Youth Games tel tur hian National Youth Championship leh National School Games-ah te chet ṭhat a ngai a, wildcard hmanga tel theih dan a awm bawk. Mizoram hi National Youth Championship an che ṭha lo a, inelna hnuhnung berah boxer pariat tirin tun ṭuma telte hian bronze medal hnek chhuakin KIYG khel turin an tling.

National School Games (Boxing)-ah Mizoramin boxer an thawh lo a, wildcard dilnaah tling zo an awm lo bawk. Hei vang hian KIYG 2025, Patna-a inelna neihah hian boxer pahnih chauh an tel ta ni.

Boxing-a Mizoram aiawh te hi coach Vulṭhavunga (SYS) leh C. Vanlalchhuanga (SYS) ten a hruai a, Khelo India Young Games-a Mizoram chef de mission hi Rozamliana (Chief Coach, SYS) a ni.