Virat Kohli-a'n Test cricket a chawlhsan

Cricket legend Virat Kohli chuan Test cricket khelh a chawlhsan thu nimin khan a puang. Kar liam ta Nilaini khan India captain Rohit Sharma pawhin Test cricket khelh a chawlhsan tawh bawk. India hian thla thar June 20, Zirtawpni aṭangin England nen Test series an khel dawn a, cricketer ropui pahnih Virat leh Rohit te tel loin an inlan a ṭul tawh dawn a ni.

Kum 36 mi Kohli hian Test match vawi 123 a khel a, 9,230 runs siamin chawlhrualin 46.85 runs a siam. Kohli chuan, "Kum 14 liam ta aṭang khan India tan Test match ka khel ṭan. Dik taka sawi chuan hetiang tak hian Test cricket hian min thlak danglam ang tih ka ngaituah ngai lo. Test hian min fiah a, min siam ṭha a, cricket pawna nun dan thlengin min zirtir a ni," tiin a sawi.

India-in 2024 T20 World Cup an champion zawh khan Kohli hian T20 khelh a chawlhsan a, ODI erawh a khelh chhunzawm tura ngaih an ni. Kohli hian kum 2011 khan India leh Test match an inkhelh ṭumin a khel ṭan a, India tan captain chhoin vawi 68 a captain-na hnuaiah khelin vawi 40 an chak.

India captain hlui Kohli hi a inkhelh hunlai batter ṭha pali zinga mi a ni a; Joe Root (England), Steve Smith (Australia) leh Kane Williamson (New Zealand) te nen huang khatah an dah a, chutihrualin Kohli erawh a lar ber thung. India batter zingah Sachin Tendulkar, Rahul Dravid leh Sunil Gavaskar te chiah amah aia Test cricket-a run siam tam an awm a ni.