Leicester-in Man United an chelh

December 26 zan Premier League inkhelah Leicester City leh Manchester United te 2-2 in an inhnehtawk. King Power Stadium-a inkhelah Manchester United-in ṭum hnih goal khung hmasa mah se Foxes-in an sut ve ve.

United tan Marcus Rashford-a'n minute 23-naah goal hmahruai a khung a, Leicester-in Harvey Barnes hmangin minute 31-naah an sut. Ole Gunnar Solskjaer-a'n bench aṭangin Edinson Cavani a luhtir a, minute 79-naah Uruguayan striker hian Bruno Fernandes goal khung tur a siamsak. 

Minute 85-naah Jamie Vardy ball pet chuan Axel Tuanzebe a per a, keeper David de Gea tan dan ngaihna a awm lo. Team pahnihin point khat ve ve an hlawh chhuak a, Man United chungah Foxes an awm chhunzawm.

Leicester City-in Premier League-a an elpui dang club angin sum hman tur an ngah lo a, chuti chung chuan season hmasa khan hun tam zawk palina chinah an awm. Tun season match 15 khelh zawhah pawh a sang pali zingah an awm a, belhchhian an dawl hle.

Foxes boss Brendan Rodgers chuan, "Nikum khan theihna sang tak kan nei tih kan pholang a, coaching tam zawk nen player-te an inringtawk a, hma an sawn zel. Club lian Liverpool, Manchester United leh Manchester City te hi chuan huhang an nei tawh a, keini pawhin kan nihna huaisen takin kan lantir.

"Budget aṭanga thlir chuan kan inthlau a, football aṭanga teh erawh chuan kan elpha a ni. Man United pawh harsatna tam tak kan siam a, khualmuala record nei ṭha em em lakah inkhel kan thunun thei a ni," tiin a sawi.

Tun season Manchester United khelh dan hi kawng chhuk chho ang deuh a ni a, chet ṭhat lai an nei a, chet chhiat lai an nei tel bawk. Ole Gunnar Solskjaer ban duhtu an tam lai takin an che ṭha leh ṭhin.

King Power Stadium-a an lengluh hma hian Man United hian khualmualah match 10 chhung an chak tawh a, kum 2008-a Chelsea record siam nih rual turin vawi khat chiah chak mamawh tawh mah se an ṭang tluan thei lo.

Man United-in ṭum hnih hma an hruai a, minute 10 chhung hma an hruai thei lo ve ve. Foxes tana Harvey Barnes-a goal khung a kawh ṭha a, chutihrualin United an fimkhur tawk lo. Fernandes-a'n ṭul lo taka 'nutmeg' a tum aṭangin a inṭan a, Scott Mc Tominay-a'n Barnes-a'n vei lam a hmang thiam zawk tih a hre lo nge hmun awl zau tak a pe bawk.

Goal hnihna an chhuah dan pawh sawisel theih a la ni tho. Box chhungah Jamie Vardy chauh a awm chungin United tlarhnungin English striker hi hnaihna chang an hre lo a, point hnih hlu tak an chan phah.

Man United tlarhnung a phui tawk lo tih chu hriat sa a ni a, tlarhma lamin point thum hlawhchhuah nan an tihtur an ti tawk lo tiin a sawi theih. Marcus Rashford-a'n goal khung mah se goal a khung a hma hian hnai tak aṭangin a tauh goal lo a, goal a khung hnuah pawh keeper Kasper Schmeichel chiah a paltlang thei lo.

Anthony Martial-a goal khung chu offside vangin pawm a ni lo. Hun tawp lama goal mamawh laia Rashford a na der chuan thil awm dan a sawifiah a, United tlarhmain chak châk tak takna thinlung an nei lo tih a lang. Chutihrualin Man United match an ngah avangin Solskjaer-a'n lo theih loin player a siksawi nasat a ṭul a, hei hian an khelh dan a nghawng telin a lang bawk.

Manchester United manager Ole Gunnar Solskjaer chuan, "Minute 10 chauh a awm tawh a, goal kan khung a nih chuan chak mai turah a inngaih theih tawh. Amaherawhchu  vawi tam tak kan khingpuite kan lehthal tawh a, min lehthal ve tura ngaihna kan nei a ni ber. A harsa dawn tih erawh kan hre sa a, kan chak ṭep a, a tawp kan thleng zo ta lo," tiin a sawi.

United hian December 29, Thawhlehni zan dar 1:30 hian Wovlerhampton Wanderers an mikhual nghal dawn a, Leicester City hian zanin (December 28, 2020) dar 8:30-ah Crystal Palace an hmachhawn nghal ang.