Anfield-ah Mourinho hnuaia a vawi khat nan United

"Fan-te buaina siam lo turin ka ngen a, hetiang ang match liantham hi thil mawi lo takin a hliahkhuh tur a ni lo," tiin manager ṭawng hnem ve tak Jose Mourinho meuh a ṭawng chhuak - zanin dar 12:30-a English club lian bera inchhal pahnih Liverpool leh Manchester United inhmachhawn tur hi a boruak a lian tih hai rual a ni lo.

Liverpool leh United pawhin thuchhuah inṭawm siam nghalin, "Premier League-a game ropui ber kan khel dawn tih kan hria a, fan-te hnenah mi in ṭawiawm tlat ṭhin avangin lawmthu kan sawi a ni. Mahse, engti hawi zawng pawha midang tana buaina siam lo turin kan inchah a, chutianga ti lui an awm a nih chuan hremna na tak pek an ni dawn a ni," an ti!

Intawn hnuhnung

Team pahnih an intawn hnuhnung ber chu season hmasa Europa League last 16-ah a ni. Europe-a team pahnih an intawn hmasak bernaah hian Reds an chungnung zawk a, inkhel pahnih belhkhawmah 3-1 in an chak. Inkhelh zawha sawi hlawh zawk erawh result ni loin team pahnih fan-te buaina a ni. Anfield-a an inkhelh hmasa zawkah Liverpool fan-ten stadium chhunga ken luh phal loh halmawi an hal a, buaina an siam avangin a hunah tak inkhel ṭan theih a ni lo bawk. Old Trafford-ah United fan-ten Liverpool fan-te luhna tur an lo dang a, an insual bawk - police in mi panga an man.

Red fans ṭhenkhat chu United fan-te ṭhutna tuara duanah an ṭhu a, Reds banner nen an zai vel! Club pahnih hi UEFA chuan an fan-te nungchang mawi lo vangin pawisa a chawitir ve ve a, Liverpool phei chu an fan-ten Old Trafford-ah thil tih chhiat an neih nual avangin a siam ṭhatna tur sum chawi belh tir an ni.

Buaina lo kiang rawh...

Kum 1958 khan a hunlaia "Busby Babes" tia hriat lar Man-chester United team chuanna British European Airways a chesual a, supporter ṭhenkhat leh journalist-te nen an vaia mi 44 chuang zingah mi 23-in nunna an chan a, mi pariat chu United player an ni. He chhiatna hi a rapthlak tehlul nen Liverpool fan-ten Europa League-a an in hmachhawn ṭum hian an hmelma United deusawh nan an hmang.

United fan-te pawh an thiam bik lo. Hillsborough chhiatna tia an sawi fo ṭhin, kum 1989 FA Cup semifinal-a Liverpool leh Nottingham Forest inhma-chhawn ṭuma inpawng nekna avanga Reds fan thi ta 96 te vanduaina chu Liverpool auh el nan an hmang a, team pahnih boruak tisosangtu mai a ni.

Hetiang karah hian Mou-rin-ho chuan vanduaina tawp khawk hmanga in auh nawmnah a duh loh thu sawiin, "Football-ah chuan thil tam tak a thleng fo. Inkhela kan chetsual leh chak loh vanga in deusawh hi chu thil pangngai a ni. Mahse, mihring vanduaina erawh nuihza siam nan hman chi a ni lo a, kan ngai thutak tur a ni," tiin Red Devils fan-te an awm dana fimkhur turin a chah lawk.

Klopp-a phur

Liverpool manager Jurgen Klopp chuan, "Team ṭha tak pahnih kan inhmachhawn dawn a, United hian player class sang tak tak an kawl nual. Mahse, hei hi Anfield a ni a, chu chu kan pholan a ṭul a ni. Match lian tak kan khel dawn a, khawvel pumpuiin he inkhel hi an thlir dawn. Inkhel satliah a ni dawn lo a, a danglam bik a ni," a ti.

September Premier Lea-gue manager of the month chawimawina dawngtu Klopp-a'n Europa-ah United hneh tawh mah se uan nan a hmang duh lo a, "Khatih lai khan player class sang Zlatan Ibrahimovic leh Paul Pogba an la nei lo a, tunah chuan an danglam tawh. Hei vang hian an chak dawn tihna erawh a ni lo a, chance an nei ve tho ka tihna chauh zawk a ni Wayne Rooney pawh world class player a ni a, mah se Liverpool manager tan United player duh a thiang lo," tiin a sawi.

German coach chuan tun hnaia hliam nei a pla-yer pali Adam Lallana (ṭhal), Georginio Wijnaldum (malpui), Nathaniel Clyne (khup) leh Dejan Lov-ren (ṭhal) te chu United hma-chhawn hmana an dam a beisei thu a sawi bawk.

Anfield hlau lo Mourinho

United boss Mourinho chuan, "Anfield-a team kaih-hruai hi chu engtiklai pawhin nuam ka ti reng ṭhin. Hlawhtlinna chang reng bik lo mah ila Anfield boruak hian min hip a, he stadium-a inkhelh hi chu a danglam bikvṭhin," tiin khualmuala Liverpool hmachhawn a hlau lo hle.

Portuguese manager chuan sawi chhunzawmin, "Game dang-lam bik a ni ngei tih chu ka pawm a, Inter-AC Milan, Real Madrid-Barcelona, Porto-Benfica te boruak nen pawh kan khaikhin thei ang. Mahse, ka tan chuan tun season hi Anfield leh Old Trafford ringawt a ni lo. Inkhelh tur tam tak a awm a, point hloh tur tam tak leh tum tam tak a awm a ni," tiin Liverpool ringawtah rilru a pek loh thu a sawi.

Mourinho leh Klopp hi vawi nga an lo inhmachhawn tawh a, Chelsea boss hlui hian vawi khat chiah hnehna a la chang - kum 2013 Champions League semifinal second leg-ah Borussia Dortmund chu 2-0 in an hneh. First leg-ah 4-1 ngawta a lo tlawm tawh avangin Portuguese manager hi chak zawka a ṭan
ṭum pawhin a lunghnur zawk a ni - zaninah a record duhawm lo thaichhiat a duh ang.