PSG-in Nice um zel

French Ligue 1 khelh mekah Zirtawpni zan khan Nice chuan Paul Baysse leh Jean Seri te goal hmangin Lyon 2-0 in an hneh a, champion lai Paris St-Germain pawhin Nancy lakah 2-1 a hnehna changin hmalam an pan zel.

PSG tan Lucas Moura chuan free-kick a pet goal hnuah Edinson Cavani bawk a langsar zui leh a, Uruguay international hian tun season-a a goal 12-na khungin a team hi hnehna a chanpui.

PSG manager Unai Emery chuan, "Goal hnih khungin goal venhim kawngah thawkho ṭha viau mah ila inkhel pumpui kan thlir chuan hmasawnna tur kan la ngah hle. Basel nena kan inkhelh hma ngeiin kan ṭhat tawk lohna lai siam fuh kan tum ang," tiin Champions League-a Swiss club an hmachhawn tur a thlir nghal.

Match kua an khelh tawh aṭangin Nice hian point 23 hmuin league hma-hruaitu an nih chhunzawm zel a, khelh zat inangah PSG leh AS Monaco ten point 19 ve ve an hmu thung.