La Liga-ah goal a sur

Hliam vanga kar thum zet a inkhelh theih loh hnuah Lionel Messi-a lo kir a, goal khung tura hun a mamawh zat chu minute thum a ni. Inrinni zan khan Barcelona hian Deportivo La Coruna an mikhual a, minute 55-naa Sergi Busquest thlaktu Messi hian minute 58-naah goal khung nghalin an mikhual lakah 4-0 in a team hi hnehna a chanpui. Catalan club tan Rafinha chuan goal hnih khungin Luis Suarez-a'n goal khat a khung ve bawk a, goal li an chhuah hnuah Deportivo defender Lau-reano chu Neymar nghawk luih vanga hnawhchhuah a nih bawk avangin mikhual team tan thawhleh ngaihna a awm lo.

Barcelona boss Luis Enrique chuan, "Deportivo hi goal chhuah khat tak team an ni a, an laka goal li kan khung thei kha ka lawm a ni. Ka naute khelh danah ka lawm a, engkim kha a nih dan tur ang thlapin a thleng a ni," tiin a lawm hle.

Real chak chiang

Match li chhung an khingpui an inhnehtawkpui hnuah milian muthlu Real Madrid tih harhin an awm a, khualmualah Real Betis chu 6-1 zetin an sawp. Real tan Isco chuan hmun pawimawh chan a phu tih pholangin goal hnih a khung a, Raphael Varane, Karim Benzema, Marcelo leh Cristiano Ronaldo ten goal khat ṭheuh an khung bawk. Real Betis tan Alvaro Cejudo chuan goal khat khung ve bawk mah se an mualpho zualpui tur khuhna mai a ni.

Real Madrid boss Zinedine Zidane chuan, "Match li zet kan chak zawh loh hnuah
ṭha takin kan khel a, intih harh nan khatianga khelh kha kan mamawh chu a ni. La Liga angah chuan eng team mah hi tenau an awm lo a, zanin kan khelh danah khan ka lawm takzet a ni," a ti.

Hmahruaitu Atletico

Goal ven thiam Atletico Madrid-in goal khung pawh an thiam tih pholan nan an mikhual Granada chu 7-1 zetin an sawp a, La Liga-ah hma an hruai chhunzawm zel. Granada hian minute 18-na lekah Isaac Cuenca goal hmangin hma hruai mah se Atletico chhaih kawlhna goal mai a ni. Diego Simeone-a naute tan hian Yannick Carrasco chuan hattrick a siam a, Nicolas Gaitan chuan goal hnih khungin Angel Correa leh Tiago ten goal khat ve ve an khung bawk.

Atletico Madrid coach Diego Simeone chuan goal thum khungtu Carrasco fakin, "Carrasco hi player thiam leh hmabak nei eng tak a ni a, nitin hian a hmasawnna hmuh tur hi a awm reng. Zanina a khelh anga khel chhuak tur khan nitin hian kan pui reng a ni, " tiin Belgian winger chuan hma a sawn zel thu a sawi.