Bayern leh Dortmund chak zo lo

Zirtawpni zan Bundesliga-ah Borussia Dortmund-in an khingpui draw mah se an elpui ber tawlh thluk hnuah Bayern Munich an chak thei bik lo a, an mikhual Eintracht Frankfurt nen 2-2 in an inhnehtawk.

Bayern hian vawi hnih lai hma hruai mah se minute 25 chhung player kim loa khel Frankfurt lakah hnehna an chang zo lo! Inkhel ṭan aṭanga minute 10-na lekah Arjen Robben chuan goal hmahruai a khung a, Szabolcs Huszti chuan kum 2011 hnua Frankfurt-in Bayern laka an goal khung hmasak ber ni turin an si phurh sutna goal a khung.

Joshua Kimmich-a'n Bayern tan an hmahruai vawi hnih nan goal a khung leh a, Frankfurt tana an si phurh hmasa zawk khungtu Huszti hnawhchhuah a nih hnuah pawh mualneitu club an zam lo; Marco Fabian hmangin an si phurh an sut nawn - hun tawp thlengin goal dang a lut lo a, team pahnihin point khat an insem.

Zirtawpni zanah Borussia Dortmund-in Hertha Berlin an mikhual a, 1-1 in an inhnehtawk. Mikhual team tan Valentin Stocker chuan minute 51-naah goal hmahruai a khung a, Swiss forward hi hun tawp hnaih lamah hnawhchhuah a ni bawk. Dortmund tan Pierre-Emerick Aubameyang chuan penalty hlah mah se minute 80-naah an si phurh sutna goal a khung a, Emre Mor chu Sebastian Langkamp laka a foul vangin minute 84-naah hnawhchhuah a ni bawk - Dortmund hian an khelmualah match 25 chhung a zawnin tlawm hmel an hmu ta lo.

Mizoram team nena inkhel tawh Hoffenheim pawhin hnehna an chang a, Croatian striker Andrej Kramaric leh German striker Sandro Wagner goal khung hmangin 2-1 in hnehna an chang.

Inkhel Results

Borussia Dortmund 1 - 1 Hertha BSC

Borussia Gladbach 0 - 0 Hamburger SV

FC Cologne 2 - 1 Ingolstadt

Augsburg 1 - 1 Schalke 04

Hoffenheim 2 - 1 Freiburg

Eintracht Frankfurt 2 - 2 Bayern Munich

Werder Bremen 2 - 1 Bayer Leverkusen