Wenger leh Conte hlim niah Pep a nguai

Theo Walcott-a goal hnih hmangin Arsenal chuan an mikhual Swansea City 3-2 in an hneh a, champion lai Leicester City leh an manager Claudio Ranieri te chu season hmasaa chawimawi an hlawhna hmun Stamford Bridge-ah 3-0 in an zawr.

Inrinni zan Premier League inkhel dangah goal hmaa hriam tawk lo Pep Guardiola nauten penalty vawi hnih an pet goal lo! - an mikhual Everton nen 1-1 in an inhnehtawk. Goal ven thiam Tottenham Hotspur chuan an tlarhnung phui loh tuarin West Brom lakah point khat an hlawh chhuak hram.

Theo Show...

March thla khan Emirates Stadium-ah Gunners hian Swansea mikhualin 2-1 in an tlawm. Welsh club an hneh loh hnuah Manchester United 3-2 in an hneh lo zui bawk - hei hi Wenger-a nauten season hmasa league nomawi an hlohna bul inṭanna a ngaih a ni.

French manager Wenger-a'n Swansea hi 'natna hrik' ti hialin a sawi. A zawna league match nga chhung hnehna chang tawh Arsenal tan Walcott-a'n minute 26 leh 33-naah goal khungin piancham lawmtu Mesut Ozil chuan Alexis Sanchez cross chu tawih zetin a volley lut - goal hnih khungtu Walcott hian hun tawp lamah goal ban leh bar a pet per bawk.

Manager thar Bob Bradley naute goal hnih an phurh hnuah an nguai bik lo, Granit Xhaka tihsual vangin midfielder Gylfi Sigurdsson chuan an siphurh a sut
ṭhen bakah forward Gonzalez Tomas-a'n an goal hnihna a khung bawk.

American manager hnuaia khel Swan-sea an hmuhnawm a, minute 70-naa ṭul lo taka a foul vanga Arsenal midfielder Xhaka hnawhchhuah a nih hnuah phei chuan inkhel an thunun zawk - vawi 527 zet ball in pass kualin Gunners aiin vawi 11 laiin an in pass hnem zawk! Point thum hmutu Arsenal an vannei.

Manager thukhawchang

Arsenal manager Wenger chuan, "Inkhel kha ngun taka kan en chuan theihna sang tak kan nei tih a lang chiang hle, chutihrualin hmasawnna tur erawh a la tam. Manchester City nen kan point hmuh zat a inang ta a, hnehna chan hi zengheta kan neih chhunzawm theih a duhawm hle," a ti.

Swansea manager Bradley chuan, "Inkhel bul kan ṭan chhe em em chunga goal hnih khung thei tura hun ṭha kan insiam thei kha a lawmawm. Ka naute hi team game khel turin an ṭha tawk a, kar khat chhung kan inzir ho leh a nih chuan hma kan sawi ngei ang," tiin a sawi.

Tlarhma bil

Player an nih laia Barcelona tana lo khel dun tawh Pep Guardiola leh Ronald Koeman te manager langsar an nih hnuah Etihad Stadium-ah an intawng ta a, Everton striker Romelu Lukaku (64') leh Manchester City striker Nolito (72') ten goal khung mah se player langsar ber chu Everton goalkeeper Maarten Stekelenburg a ni.

Netherlands international hian Kevin de Bruyne leh Sergio Aguero te penalty pet a dan sak bakah ṭum nga dang Manchester City goal khung tur chu ṭha takin a dan bawk. Premier League chanchinah goalkeeper pariat chiah match khata ṭum hnih penalty dang thei hi an la awm.

City tan German rawlthar duhawm Leroy Sane chuan inkhel bul a ṭan a, kum 20-a upa midfielder hi inkhela danglamna thlen khawpin a khel ṭha lo. A club hlui hmachhawntu pound makatduai 47.5 man centre back John Stones a rintlak thung.

Ball possession 72% zet chang chunga goal khat chauh an khung avangin Pep-a rilru a buai hlein a rinawm a, hetihlai hian league match riat an khelh aṭanga goal ruk chauh chhuah tura a naute remkhawm thiam Toffees manager Koeman a fakawm thung.

Eng nge an sawi?

Manchester City manager Guardiola chuan, "Kan theihna zawng zawng kan hlan a, duhthusama ṭha erawh a ni lo. Everton khan an hun ṭha neih chhunah goal an khung a, an vannei kan tih rualin Ronald Koeman-a naute khan an goal an veng ṭha tawk a ni," a ti. Spanish manager hian ball chang tam chunga goal an khung lo chuan sawisel hlawh mah se a naute a khelh tir dan phung a thlak danglam dawn chuan loh thu a sawi tel bawk.

Everton manager Koeman chuan, "Team tam zawkin kut benga an chhuahsan ṭhin Eihad Stadium aṭanga point khat nena haw hi a chhia ka ti lo. Ka nauten an khel
ṭha em em a, a bik takin kan goalkeeper khan a inkhelh tawh azawnga a khelh ṭhat ber
ṭum a tawng ni hialin ka hria," tiin a sawi.

Conte-a Blues

"Goal khung ṭeuh kher a ngai lo, khing-puite aia khung tam bakah goal chhuah tlem zawk a tawk mai," ti a lo sawi tawh
ṭhintu Conte-a'n Chelsea nomawi chhuhsaktu Claudio Ranieri lakah ṭhat a chuah duh lo a - Diego Costa, Eden Hazard leh Victor Moses te goal hmangin an mikhual Foxes hi an lo hrem.

Italian manager Ranieri naute hian an league match hmasa pariatah point riat chiah an la hlawh chhuak a, season hmasa Chelsea dinhmun ang chauh kha an ni mek - thawhleh chu thil theih loh ni lo mah se midang khelh dan enin a harsa tawh ang.

Foxes manager Ranieri chuan, "Corner aṭanga goal kan chhuah a nih chuan keimahni tihsual tihna a ni. Goal an phurh hnuah inkhel boruak thlak danglam turin kan tho chhuak tawh lo. Tunah chuan Champions League kan ngaihtuah leh phawt ang," a ti.

Foxes tana league match hnuhnung vawi 36 zet inkhel bul ṭantu Riyad Mahrez chu bench-ah ṭhuttir a ni, hei hi Thawhlehni zan Champions League group match khel tura Denmark club FC Copenhagen an lo mikhual dawn vang nia ngaih a ni.

Chelsea manager Conte chuan, "Ka naute khelh dan ka hmuh tawh chinah chuan an khelh ṭhat ber ṭum ni hialin ka hria. Inpumpekna ka hmuh avangin ka lawm, pawn lama kan thawhrim rah chu khelmualah a lang chhuak," tiin a sawi.

Spurs an chelh

Premier League season kal meka goal chhuah tlem ber Tottenham (goal 4) chuan minute 82-naah West Brom midfielder Nacer Chadli an veng zo lo a, si khat faia an chak lo mai dawna a lan hnuah hun tawp hma chiahin Dele Alli chuan an si phurh a sut ham.

Mauricio Pochettino naute hian match riat khelh tawhah tlawm an la nei lo a, vawi nga hnehna changin ṭum thum chu an khingpuite nen an inhnehtawk - kum 1960-61 season-a a zawna vawi 11 an chak zawn ang em erawh kha chu an phak lo nachungin kum bul an ṭan fuh thawkhat hle.