Vawiin aṭangin MPL5 Under 18

Flying Christabel Mizoram Premier League Under 18 chu vawiin hian Rajiv Gandhi Stadium, Mualpuiah khelh ṭan a ni dawn.

Vawiin hian team zawng zawng an inlan nghal dawn a, tukin zing dar 7:00 hian Chanmari West FC leh Ramhlun North FC ten match hmasa ber an khel ang. Match hnihnaah inelna hmasa pahnih champion Chanmari FC-in Zo United an tum ang a, Aizawl FC leh Chhinga Veng FC te an inkhel zui ang.

MPL kum naupang zawk inelnaah Dinthar FC-in final an la lut vek a, nomawi erawh an la chawi lo. Final-a vanduai ṭhin Dinthar FC hian vawiin inkhel hnuhnung berah Bethlehem Vengthlang FC an hmachhawn ang.

MPL Under 18 inkhela chak zawng apiangin Rs 1500 an dawng ang a, chak lo zawkin Rs 1000 an dawng ṭhin ang. Inhnehtawk an awm a nih chuan team pahnih hi Rs 1000 ve pek an ni ang. Team tin hian league match sarih ṭheuh an khel dawn a, group match chak vek chuan Rs 10,500 an dawng dawn tihna a ni a, chak nei lo pawhin inelna zawh chuan Rs 7,000 an dawng pha tho dawn tihna a ni.

Team pa-riatte hi vawi khat ṭheuh an inkhelh kual zawhah a sang pali ten semifinal an khel ang a, knockout stage chinah hian lawmman a pung ang.

MPL Under 18 sponsor-tu Flying Christabel hi Canteen Kual, Dawrpuia awm niin zin veivahna (air ticketing) an buaipui theih bakah tour operator an ni tel bawk.

RG Stadium - Vawiin Inkhel Tur

7:00 AM Chanmari West FC Vs Ramhlun North FC

9:00 AM Zo United FC Vs Chanmari FC

11:00 AM Aizawl FC Vs Chhinga Veng FC

01:00 PM Dinthar FC Vs Bethlehem VT FC