Everton pahnihnaah an invawrhchho

Everton chuan December 26, Inrinni zan khan Bramall Lane-ah Sheffield United 1-0 in an hneh a, goal awmchhun hi minute 90-naa Gylfi Sigurdsson khung a ni. Toffees hian point thum an hlawhchhuah avangin match 15 aṭangin point 29 an hmu a, table-ah pahnihnaah an awm.

Sheffield United erawh match 15 aṭangin point hnih chiah an la hmu a, table mawngphahah an awm chhunzawm zel. Blades hian English football-a season bul ṭan chhe ber record an nihrual a, Premier League chauh ni loin England league sang pali record a ni. Southport and Barrow (1970-71) leh Newport County (1975-76) te nen record duhawm lo tak an chelh ho.

Sheffield midfielder Ben Osborn, "Kan theihna zawng zawng kan chhuah a, hei bak hi a awm chuang lo. Record duhawm lo tak kan siam hi kan zak a, kan dinhmun siam ṭha turin chak a ṭul a ni," tiin a sawi. Blades hian tun season-ah chak an la nei lo.

Inkhel dangah Manchester City chuan Newcastle United 2-0 in an hneh a, Pep Guardiola hote tan hian Ilkay Gundogan (14') leh Ferran Torres (55') ten goal an khung. Sergio Aguero pawh a inlan a, Argentine forward hian minute 77-naah Torres a thlak.

Spanish manager Guardiola chuan, "Aguero hi ka duh zawng tak a ni a, ka mamawh bawk. Amaherawhchu tun dinhmunah chuan kan fimkhur rih a ṭul a ni. Inhliam dam kawr a ni a, dim dawih taka kan chhawr a ṭul a ni," tiin a sawi.

Man City hian zanin dar 1:30 hian Goodison Park-ah Everton an hmachhawn dawn a, table-a team pahnih dinhmun thlirin inkhel pawimawh bik a ni ang.