Mizoramin semifinal lut

Subroto Cup Football Tournament-ah Mizoram U17 team chuan Sports Authority of India (SAI) hnehin semifinal an lut.

SYS coach R. Lal-muankima kaihhruai Mizoram team hian October 19 hian Shillong Lajong leh Brazil club Clube Atletico Paranaense te inkhela chak zawk an hmachhawn ang.

Nimin tlaia Ambedkar Stadium, Delhi-a inkhelah hian hun pangngaiah goal a lut lo. Penalty shootout-ah Mizoram leh SAI te intluk tawkin vawi nga petah vawi li ve ve an pet goal a, sudden death-a HK Lalhruaitluanga goal hmangin Mizoramin semifinal an lut. Ani bakah hian Mizoram tan M. Lalrintluanga, Silvana R. Lalruatkima, P.C. Lalruatpuia leh H.C. Remruata ten penalty-ah hian an pet goal.

Mizoram hian quar-terfinal thleng turin NCC, West Bengal (1-1), Sikkim (1-1), Car Nicobar (25-0), Railways (2-1) leh Bang-ladesh (8-0) te an lo hmachhawn tawh a, knock-out stage-ah goal khung lo mah se group stage-ah hian goal 37 an khung.

Mizoram coach Lal-muankima chuan, "Group stage kha New Wel-lington Camp-ah kan khel a, quarterfinal hi Ambedkar Stadium-a kan vawi khat khelhna a nih avangin harsatna kan tawk deuhin ka hria. Ka naute khelh danah lawm lohna tur ka hre lo, chak tumin theihtawp an chhuah a ni," tiin Vanglaini palai a hrilh.

Mizoram team aiawh kalte hi SYS Football Academy, Lungleia player-te an ni hlawm. Nikum khan Subroto Cup final-ah Pele chu khuallian a ni a, kuminah hian Rivaldo chu khuallian a ni thung ang.