Bernabeu-a inkhel tur Warszawa
Champions League vawi khat khelhna Legia Warszawa tan an tawn chin apiang mumang a ni zel rih a, zanin dar 12:15-a Real Madrid nen an inkhelhna tur Santiago Bernabeu-a len luh hi Polish club player tam zawkten mu-mang rama an mân ṭhin kha a ni.
Zinedine Zidane-a nauten Villarreal, Las Palmas, Borussia Dort-mund leh Eibar te an inhneh-tawkpui hnuah kartawp La Liga inkhelah Isco goal hnih leh Raphael Varane, Karim Benzema, Marcelo leh Cristiano Ronaldo te goal khat ṭheuh khung hmangin Real Betis 6-1 in an sawp - tun season-ah Real Madrid tan hian player hrang hrang 15 zetin goal an khung tawh.
Champion lai Real Madrid hian an group match hmasa zawkah Dortmund chu khualmualah 2-2 in an inhnehtawkpui a, hemi hnuah Ronaldo-a'n a club hlui Sporting lakah goal khungin 2-1 in hnehna an chang. Spanish club hian tun hmain Polish club hi vawi ruk hmachhawn tawhin hnehna an chang vek a, Warszawa nen erawh an vawi khat intawnna tur a ni thung.
Hetihlai hian Warszawa erawhin Dortmund (6-0) leh Sporting (2-0) te an hneh lo tawh a, duhthlang thei nise chu an mangchhia lak
aṭanga thawh chhuah nan chuan Real Madrid kher hi chu an thlangin a rinawm loh. Warszawa hian La Liga club lakah sulhnu an nei ṭha lo hle a, vawi riat an hmachhawn tawhah vawi khat chiah hnehna an chang; vawi hnih inhnehtawkin
ṭum nga an chak lo.
Zanin dar 12:15 vek hian Group F hmahruaitu German club huaisen Dortmund chu Portuguese champion Sporting khel turin an zin chhuak bawk ang.
Thomas Tuchel-a naute hi an boruak ṭhat ber lai ni lo mah se an khelh ṭhat tluan lai a ni a, Bundesliga bikah chuan an khelmualah match 25 chhung zet hneh loh nei loin an kaltluang mek. Europe lamah pawh khualmuala an zin chhuah vawi kuaah ṭum ruk hnehna an chan theih avangin an inringtawk hle ang tih a chiang.
Hliam vanga tun season-a la inlan lo Marco Reus-a'n kar khat chhung training a zawm leh tawh a, German international hi a ṭul a nih chuan chhawr theih a ni tawh. Hetihlai hian midfielder Sven Bender (ke rek) bakah defender pahnih Neven Subotic (nak ruh) leh Erik Durm (khup) te dinhmun a chiang lo.