Shanghai champion Murray-a'n Djokovic a hnaih

Andy Murray chuan a vawi thum nana Shanghai Rolex Masters nomawi chawi turin Roberto Bautista Agut a hneh. Britain tlangval hian kuminah ATP World Tour Masters 1000 title pahnih a lakna chiah a ni bawk.

Pathianni tlai final inkhelah world number 2 Murray hian Spanish world number 19 Bautista Agut chu 7-6(1), 6-1 in a hneh. Tennis a khelh hun chhungin Masters nomawi 13 a lakna chiah a ni a, a nomawi chawi tawh zawng zawng belhkhawm chu 41 a tling ta.

Kum 29-a upa Murray chuan, "Ka ngaihdan chuan kar tin mai hian hma ka sawn zel, a bik takin tun karah bik phei chuan ka ball vuak a piang mai kha a dik em em vek a ni. Tun hnaiah world ranking-a number 25 chin pali ka hmachhawn a, hnehna ka chang vek - ka khelhṭhat bakah ka vannei tel a ni," tiin a sawi.

Bautista Agut chuan, "Andy hian tun dinhmunah chuan dan ngaihna awm lo khawpin a khel ṭha, ATP number 1 nih a duh tih a chiang a, a khelh dan leh rilru puthmang en hian a chung berah a awm a nih pawhin a mak lo a. Final kan khelh zawh takah pawh khan ka tan chet ngaihna a awm lo," tiin a sawi.

Number 1?

Shanghai masters nomawi a chawi hnuah Murray chuan zawhna chhangin, "Ka thil tum ber chu kumin chhunga number 1 nih hi a ni ber lo, chutihrualin engtik hunah emaw a chung bera awm hi chu ka tum. Novak hi khawvela a ṭha ber a la ni reng a, hun rei tak chhung a talbuai lo tawp ang," tiin a elpui a la dah sang thiam hle.

Murray hian kuminah no-mawi paruk a chawi tawh a, kar hmasa lawka China Open a chawi bakah tunah Shanghai-ah a hlawhtling zui leh. Hemi hma hian Rome, Queen's Club, Wimbledon leh Rio Olympic-ah te a lo champion tawh bawk. ATP ranking-ah Murray hian point 1000 a hmuh belh a, kum 2016 bikah chuan point 915 chiahin world number 1 Novak Djokovic a chungnung zawk rih. Tun hma lama an point hmuh tawh zawng zawng nen chuan point 2,415 in an la inthlau mek thung.

Grand Slam vawi thum champion tawh Murray chuan, "Ka dam a nih chuan kuminah tournament pathum ka la khel dawn a, a awlsam lo ang. Inrintawkna leh huaisenna ka nei a, ka mamawh belh chu infuih phurna a ni," tiin a sawi.

Djokovic-a'n Australian Open leh French Open nomawi chawi mah se Wimbledon leh US Open-ah a hlawhtling lo. Rio Olympic-ah singles leh doubles-ah inlanin a match hmasa berah a tla nghal ve ve; Kiu na vangin China Open-ah a inlan thei lo a, Shanghai Rolex Masters semifinal-ah Bautista Agut hneh loin a tla bawk.

Thlirna...

Kuminah tournament pa-thum kehlh hmabak an la nei a, point 500 hmuih theihna Vienna bakah point 1000 hmuh theihna Paris Masters leh a sang pariat ten an khelh ṭhin 2016 ATP World Tour final a la awm.

Murray hian Davis Cup semifinal-a Juan Martin del Potro a hneh loh hnuah a zawnin set 23 zet a hloh lo tawh a, a khelh ṭhat vanglai a ni. Hetihrual hian an khelh hmabak Paris hi Djokovic-a'n a zawna kum thum chhung ro a lo rel tawhna hmun a ni a; Murray erawh France khawpuiah hian a la hlawhtling ngai lo thung - inum boruak a sang zel dawn.

Kum 1974 June thla khan khatih hunlaia kum 30 leh thla 11-a upa John Newcombe chu a vawi khat nan world number 1 a lo ni tawh a, Australian hranghlui hnuah kum 30 tlin hnua number 1 ni thar thei an awm leh tawh ngai lo.

Tun dinhmunah Murray hi kum 29 a upa a ni mek a, tun ang zela a khel ṭha tluang a nih chuan Newcombe-a record lo siam tawh ang hi siam leh turin theihna a nei. Hetihrual hian Grand Slam vawi 12 champion tawh Djokovic hi a tlu hlenin a rinawm lo a, an kum zat a inrual bawk avangin an inel chhunzawm zel dawn tih a chiang.