France-a zin tur Juventus

Zanin dar 12:15 hian Italian champion Juventus chu Champions League group match khel turin France-ah an zin dawn. Juve hmachhawn tur Lyon hi tun hnaiah tlahniam deuhin lang mah se Ligue 1 club zinga sulhnu nei ṭha berte zinga mi an ni thung.

Massimiliano Allegri-a'n Serie A nomawi chauh a duhtawk tawh lo a, Europe-a hlawhtlin a duh. Italian manager hian khawvela player manto ber ni turin Paul Pogba hralh mah se Gonzalo Higuain bakah tawnhriat nei ṭha Dani Alves leh Miralem Pjanic te a lalut thung - Turin club hi league hmahruaitu an ni mek.

Juve hian Champions League-a an match hmasa berah Sevilla chu goal awm loin an inhnehtawkpui a, an match hnih naah Dinamo Zagreb 4-0 in an sawp thei. Kar tawp Serie A inkhela Udinese 2-1 a an hneh ṭuma hliam vanga an chhawr theih loh Giorgio Chiellini chuan Lyon a hmachawn theih a beiseiawm.

Zagreb an hneh ṭuma tun season-a a goal hmasa ber khungtu Paulo Dybala-a'n Empoli leh Udinese lakah goal a khung chhunzawm a, Argentina forward hi Lyon tlarhnung tan ven uluk ngai bik tur chi a ni ang.

Lyon hian Zirtawpni zan khan league match an khelh avangin hah-chawlhna hun an nei rei zawk a, chutih rualin an match hnuhnung berah hian Nice 2-0 in an hneh lo. Italian club an hmachhawn hnu-hnung pathumah an tlawm vek a, zanina an hmachhawn tur Juventus nen bik pawh hian 2013/14 UEFA Europa League quarterfinal-ah inhmachhawnin inkhel pahnihah an chak lo ve ve - record hlui leh tunlai boruak thlirin Juve hi dinhmun ṭha zawk tura ngaih an ni.