Joshua leh Klitschko an inhnek dawn

British boxer rothap Anthony Joshua promoter Eddie Hearn chuan a boxer chu Wladimir Klitschko nen inhmachhawn turin inremna an neih tawh thu a sawi a, official lam aṭanga pawmpuina chauh an ngaih-chan tawh thu a sawi.

Kum 27-a upa Joshua hi IBF heavy-weight champion lai a ni a, Tyson Fury-a kalsan tak WBA leh WBO kawnghren inchuh tur a awm bawk. Mahse, boxer pahnih hian heng kawnghren hi an inchuh dawn a nih chuan official-a pawmpuina an mamawh a ni.

Ruahman lawk ang chuan Joshua hi November 26-a a IBF kawnghren humhim tura inhnek tura beisei a ni a, mah se Ukrainian boxer ropui nen hian an inhnek dawn a nih erawh chuan De-cem-ber lam tin zawn a ngai thung ang.

Joshua promoter Hearn chuan, "Boxer pahnih hian ring chhunga inhmachhawn an remti ve ve tawh a, sum leh pai chungchangah pawh inremna neih vek a ni tawh. US lama TV-a pe chhuak turte nen buaina kan nei zawk a, mah se tunah chuan engkim tihfel a ni tawh. Tuna kan hmabak awmchhun chu lehkha pawimawh tihfel ngaite tih fel a, official-a pawmpuina nghah chauh a ni tawh. Rei lo teah inhnek hun hi puanzar theih kan beisei," tiin a sawi a, inhnekna tur hmun chu mi 21,000 lenna Manchester Arena a nih a rin thu a sawi bawk.