New Zealand hmaah India chak nuamsa

India-in test series-a New Zealand 3-0 zeta an sawp hnuah ODI lamah pawh harsatna an tawk lo. Pathianni khan Himachal Pradesh Cricket Association Stadium, Dharamsala-ah India leh New Zealand hian ODI series match nga an khelh tura match hmasa ber an khel a, mualneitu India hi wicket rukin an chak.

New Zealand an bat hmasa zawk a, over 43.5-ah run 190 chauh vaw chhuakin an vaiin an out vek a, Indian bowler tha za rual hmaah Black Caps batsman te an hawihai. Mikhual team tan run 79 vaw chhuaka a tawp thleng dam Tom Latham chu run siam hnem ber a ni a, run 55 vaw chhuaktu Tim Southee-a'n a pui ṭha bawk mah se batsman dang zingah run 20 vaw kai thei an awm loh avangin New Zealand-in beisei an phak lo.

India bat hun a thleng a, over 33.1-ah mi pali chiah hlohin an target an umpha der. India tan Virat Kohli bawk player langsar a ni a, kum 27-a upa batsman hian ball 81-a hmachhawnah run 85 vaw chhuakin a tawp thleng a dam.

Indian bowler zingah Hardik Pandya chu player langsar a ni a, kum 23 leka upa fast bowler hian over sarih a vawmah run 31 chiah pein wicket thum a la. Pandya bakah hian veteran bowler Amit Mishra hmuh hmaih theih a ni lo. Kum 33-a upa spin bowler Mishra hian over 8.5-a vawmah wikcet thum lain run 49 chiah a pe ve tho a ni.

October, 20 khian team pahnih hian an ODI match hnihna an khel leh dawn a, Feroz Shah Kotla Ground, New Delhi-ah chawhnu dar 1:30-ah an inhmachhawn ang.