Europe-ah Leicester City an dang?

Leicester City-in Premier League an champion nawn dawn lo tih a hriat theih ṭan der tawh a, league-ah Claudio Ranieri hote hi Liverpool, Manchester United leh Chelsea lakah mualpho tawh mah se Champions League bikah chuan team dang an ni.

Foxes hian Champions League Group G-ah point ruk hmuin hmahruaitu an ni a, zanin dar 12:15-a an mikhual tur FC Copenhagen hian point li hmu tawhin pahnihna an ni. Group G inkhel dangah point khat chiah la hmu FC Porto leh point la hmu lo Club Brugge te an inkhel bawk ang.

Europe-ah chuan

Leicester City-in an club history-a a vawi khat nan Champions League an khel a, Premier League champion an nih avangin seeded zingah telh an ni a, an hmabak a awl sawt. Foxes-in Club Brugge (0-3) leh FC Porto (1-0) te an hneh avangin English club zinga Champions League khelh ṭan kuma a zawna chak nghal thei hmasa ber an ni.

Claudio Ranieri hote hian league-ah vawi riat chiah an la khel nachungin vawi li an chak lo a, vawi hnih lek an chak bawk. Hetihlai hian Champions League-a an hneh hnuhnung ber hi FC Porto an ni lawi si a, Portuguese club ṭha an hneh theih avangin Foxes hi dah hniam theih a ni lo. Europe-ah chuan sum hmang hnem Ranieri hote hi club dang an ni a, tun season Champions League-a match hmasa pahniha chak thei club Atlético Madrid, Barcelona leh Napoli te zingah an tel.

Engtin zel?

Leicester City leh Copen-hagen hi an vawi khat inkhelhna tur a ni a, Danish club Copen-hagen hian English club vawi li an hmachhawn tawhah chak an nei lo (D2 L2).

Danish club hrim hrimin England vawi 14 (D5 L8) an tlawh tawhah vawi khat chiah an la chak a, Midtjylland-in August 2008 khan UEFA Cup qualifier-ah Manchester City an hneh. Copenhagen pawh hi beisei aia bul ṭan ṭha an ni a, group stage paltlang tura ngaih an ni lo. Leicester hmachhawn tura Copenhagen player langsar ber chu Andreas Cornelius a ni a, Danish striker hi Cardiff City a hlawhchham tawh a ni.

Leicester City tan Riyad Ma-hrez a khelṭha a, Algerian winger hi Europe bika Foxes goal li zinga goal thumah a inrawlh. Mahrez hian Champions League bikah goal hnih a khung tawh bakah assist vawi khat a nei tawh.

Kartawpa Chelsea an hneh loh zawhah Ranieri chuan, "Kan rilru puthmang a dik lo. Season liam ta khan hetiang rilru hi ka player-ten an pu lo, kan insiamṭhat a ṭul. Kan rilru puthmang kan thlak hlawk a ṭul a ni," tiin chak duha an rilṭam leh a ṭul thu a sawi.

Foxes tana thu lawmawm chu tun season-ah King Power Stadium-ah hneh loh an la nei lo a, league-a vawi li an chak loh pawh hi khualmualah vek a ni.