Southampton chakna Austin

Pathianni zan Premier League inkhelah Southampton chuan Charlie Austin goal hnih khung hmangin Burnley 3-1 in an hneh a, defender Jose Holebas goal khat khung chu Watford tan point thum hmuh nan a tawk bawk.

Saints forward Austin hian league-ah a club hlui Burnley a hmachhawn hnuhnung vawi thumah goal a khung vek a, midfielder Nathan Redmond chuan goal khat khung ve bawkin point thum an hlawh chhuak. Claude Puel-a naute hian match riat khelh aṭanga point 12 hmuin league table-ah pariatna an ni.

Southampton hi an mahni mualah hian tawh an khirh hle a, Premier League match an khelh hnuhnung pakuaah chak loh an nei lo, vawi ruk hnehna changin
ṭum thum dang chu an inhnehtawk thung.

Saints tan hian first choice defender Cedric Soares leh Ryan Bertrand te chu hliam vangin khel thei lo mah se an aiawha lut Matt Targett leh Sam McQueen an khel chhe lo a, forward Sam Vokes-a penalty pet goal bak an lamah goal hlauhthawnawm a awm lo.

Inkhel dangah Aitor Karanka-a enkawl Middlesbrough-in an khelmualah result ṭha an la hlawh chhuak thei lo chhunzawm zel a, an mikhual Watford lakah 1-0 in an tlawm - kum sarih hnua a vawi khat nan Riverside-ah a zawnin vawi thum an tlawm ta!

Kum 32-a upa Holebas hian tun season-ah goal hnih a khung bakah a
ṭhiante goal khung tur vawi khat a siam sak tawh bawk, defender zingah chuan season kal mekah goal khung kawnga thawh hlawk ber a la ni.