Club captain Icardi auh-el zanah Inter an tlawm

Inter Milan fan-te chuan an khelmuala Cagliari an hmachhawn ṭumin club captain Mauro Icardi chu captain armband hlih sak turin an au rual a, he inkhelah hian 2-1 in an tlawm zui bawk.

Kum 23-a upa Icardi hian tun hnaia a chanchin ziahna lehkhabu tih chhuahah Inter fans ṭhenkhat a sawisel a, hei hi Serie A club ṭantute hian an ngaithei lo - Cagliari an hmachhawnna inkhela Icardi-a'n penalty a pet goal loh ṭum pawn a lawm nan kut an beng hial!

Portuguese midfielder Joao Mario chuan a club thar Inter tana a goal hmasa ber chu minute 11-naah khungin mualneitu team tan goal hmahruai a khung a, mahse Icardi-a'n penalty a hlah laiin Federico Melchiorri chuan Cagliari tana goal hnih khungin a chak zawkah an ṭang ta a ni.

Icardi buaina

February 2015 khan Inter Milan chu Sassuolo lakah 3-1 in an tlawm a, Icardi hian inkhelh zawhah fans lamah a jersey vawm chhoin fan-ten amah vawm let nan an hmang! Fans leh Icardi inkarah buaina a chhuah chhunzawm a, he thil thleng chungchang hi Icardi chuan a lehkhabuah ziakin a player puite chuan a chet dan vanga an fak thu leh ngaisang taka an en thu a sawi.

Hei tak hi Inter Milan fan-te hian an ngai hua a, Cagliari an hmachhawn ṭum hian tun season Serie A-a goal ruk khung tawh striker an duh lohna thu hi an tlangaupui ta a ni. Inter fan-te hian Argentine striker hi auh nawmnah mai an duh tawk lo a, captain a nihna hlihsak turin Inter hotute an ngen a, Icardi duh lohna banner lian tak tak an pholang bawk.

Club thukhawchang

Inkhelh ṭan a nih hma hauh-in Inter fan-te lungawi lohna hriat a ni tawh a, club hotu zinga ṭawngchhuak hmasa pawl chu club captain hlui leh vice president ni mek Javier Zanetti a ni. Kum 43-a upa Zanetti chuan, "Icardi lakah hremna kan lekkawh dawn leh dawn loh in hre duh a ni chuan ka chhanna chu 'kan hrem ngei ang' tih hi a ni. Fan-te hi he club tana mi pawimawh ber an ni a, an lungawi lohna hi kan hrethiamin kan zah sak em em a ni," a ti.

Inter Milan tana season 19 chhung khel thei defender ṭhin chuan sawi chhunzawmin, "He club hnuaia thawk mek hnen aṭangin mahni club chhungkua ngei sawiselna hi kan pawm dam thei lo ang. Captain armband kan chhuhsak dawn leh dawn loh erawh ka sawi thei lo a, a pawimawh ber chu kan nung-chang leh he club ropui tak hi a inmil tur a ni," tiin a hnampui pa a chhan duh lo - Inter sporting director Piero Ausilio chuan Zanetti thusawi chu club pumpui in an pawmpui thu a sawi bawk.

Icardi huatna

Inter fans ruhkawl intel-khawm lian ber pawl Curva Nord chuan an website lamah an captain duh lohna hi an ziak kur chei chuai bawk a, "Icardi, he hmuna i hun chu a zo," tih chu an website lama Icardi an duh lohna an tarlan langsar zual zinga mi a ni.

Curva Nord te chuan, "Icar-di-a lehkhabu ziah kha lehkhabu lak tlak loh tak a ni a, kan duh zawng chu he club tana i theihna leh i rinawmna i lantir hi a ni mai. Mahse, chung ai chuan keini Inter fan-te hi mi hlauhawm anga min chhuah a duh zawk. Icardi hian Inter captain armband hren hi a phu lo a ni," an ti.

Icardi hian Pathiannia Cag-liari an mikhual hma hian social media lamah fan-te laka thupha chawina ziakin, "Ka hun tawn ṭhenkhat ka thailannaah a lo lang ve a ni mai a, ka tisual a ni. He captain armband hi ka tan chuan a hlu em em a, ka mang rama min chentirtu a ni. Inter hi ka hmangaih em avangin ka tan chuan in hlu em em a ni," tiin a sawi a, mah se Curva Nord lam hian an captain hi an ngaidam thei lo tih an auh elna hmangin an lantir.

Manager ngaihdan

Nipui laia Inter Milan pantu manager Frank de Boer chuan Icardi penalty hlah chungchang sawilangin, "Ni dang ang chu nise Icardi khan penalty kha a pet goal ngei ngei ang. A dang erawh engmah sawi tur ka nei lo. Kan dinhmun hi uluk taka kan thlir a ṭul a, player leh fans tana ṭha tur kan ngaihtuah kawp a ngai dawn a, kan dinhmun ṭhat lohzia hi kan pawm a ngai a ni," tiin inelna hmachhawn tur tam tak a awm laiin club chu buai hman an nih loh thu a sawi.

Dutch manager enkawlna hnuaiah Inter Milan hian league match riat khel tawhin vawi thum chiah hnehna an la chang a, Cagliari laka an tlawm leh tak avangin an khelmuala league match an khelh tawhah Juventus an hneh bak kha point thum hlawhchhuah an la nei leh lo.

Milan an chak

AC Milan-in season duhawm an hman an chhunzawm zel a, match 12 chhung chak loh tawng loa kaltluang tawh Chievo kaltluang lai tihtawp sakin 3-1 in an hneh. Milan tan Juraj Kucka-a'n goal hmahruai a khung hnuah M'Baye Niang-a'n a chhunzawm ve leh a, Milan midfielder hlui Valter Birsa chuan freekick hmangin Chievo tan goal khat khung ve mah se Dario Dainelli-a'n an own goal a khung hnuah Milan an chak chiang.