Coach thar hnuaiah Valencia chak

Valencia-in coach thar Cesare Prandelli hnuaia an match hma-sa berah Sporting Gijon an hmachhawn a, 2-1 in Italian manager enkawlna hnuaiah hnehna an chang nghal.

Valencia tan Mario Suarez-a'n goal hmahruai a khung hnuah chawlhlawk hman a nih hmain Carlos Castro chuan Gijon tan an siphurh a sut a, team pahnih an inngam tawn hle.

Mahse, second half-ah Atletico Madrid midfielder hlui Suarez bawk a inlar nawn a, hnai set sawt aṭanga an goal hnihna khungin chak zawkah Valencia an ṭang ta a ni. Sporting Gijon tan league match nga chhung a zawna an tlawmna a ni thung.

Valencia hian Italy boss hlui Prandelli an rawih hma hian manager lailawk Voro enkawlna hnuaiah match thum an khel hman a, vawi hnih hnehna an chang. October 1-a Prandelli rawih a nih khan Fiorentina boss hlui hian Champions League-a Valencia hruai kir a duh thu a sawi a, a match hmasa berah chakin bul a ṭan.