Racers GP-a inlan tur Usain Bolt

Jamaican sprinter Usain Bolt chuan intlansiak a chawlhsan hma ngeiin an rama an neih ṭhin Racers Grand Prix-ah vawi khat inlan leh ngei a tum thu a sawi chhuak.

Kum 30-a upa Bolt hian nakkum August 5-13 chhunga World Championship hnuah intlansiak a chawlhsan tur thu a lo sawi tawh a, hemi hma hian June 10-a neih tur Racers Grand Prix-ah hian a inlan hmasa dawn tihna a ni.

Olympic gold medal pakua la tawh Bolt chuan, "Racers Grand Prix hi Jamaica-a ka intlansiak hnuhnung ber a ni tawh ang, nakkum World Championship zawh hnuah ka chawl dawn tih ka lo ti chiang tawh a, ka hun hnuhnungah hian a ṭha thei ang bera ka inlan theih nan tun aṭangin inbuatsaihna ka nei," tiin a sawi.

Bolt hian Beijing, London leh Rio Olympic-ah khan 100m, 200m leh 4×100m relay-ah te gold a la vek a, khawvel sprinter piang tawh zinga tlan chak ber record siamtu niin 100m leh 200m bikah hian world record kawl mektu a ni.