Hmahruaitu Liverpool laka point hlawh chhuaktu Baggies

Premier League table-a 19-na ni mek West Bromwich Albion chu tun season Premier League-a Liverpool khelmuala point hlawh chhuak hmasa ber an ni a, Anfield-ah league hmahruaitu hi 1-1 in an inhnehtawkpui. 

Liverpool hian minute 12-na leka Sadio Mane goal hmangin hma an hruai a, he goal hi Jurgen Klopp-a nauten hnehna an chanpui mai dawn niin a lang hman - mahse, minute 82-naah Baggies tan Semi Ajayi chuan si phruh a rawn sut a, Liverpool vanneih zan a ni lo. 

Baggies-in Slaven Bilić an ban hnuah  Sam Allardyce chu an manganna lak aṭanga khai chhuak turin an ruai a, Big Sam hnuaia an match hmasa berah 3-0 in Aston Villa ngam lo mah se Liverpool laka point an hlawhchhuah theih avangin beiseina thar an nei ang. 

Liverpool-in first half-ah inkhel an thunun a, minute 12-na lekah Mane hmanga goal an khung bawk avangin an chak dawn leh dawn loh chu zawhna a ni lo a, "Eng zat tak khung ang maw?" tih chu zawhna a ni. 

Reds captain Jordan Henderson chuan first half-ah hian vawi 85 zet pass a nei a, West Brom (46) team pumpui aiin chawlhlawk hmain pass a ngah zawk - mahse, first half-ah Merseyside club-in 85% ball an chang chungin goal dang an khung thei miau lo a, a tawpah an tuar. 

Liverpool defender Joel Matip chu minute 60-naah hliam vangin Rhys Williams chuan a thlak a, Matip chhuah hnuah Reds tlarhnung a nghing sawt - Alisson-a'n Karlan Grant khung tur nia lang a dante kha ṭha tak a ni.Kum 29 mi Matip-a chawlh chen tur hi he thu buatsaih a nih lai hian a la chiang thei lo.

Liverpool an ding nghet reng thei lo a, hun tawp nan minute riat chiah a awm tawh tihah Ajayi chuan an practice ang thlap emaw tih mai turin si phurh a rawn sut - a team tan point khat hlu tak a hlawh chhuak.

Tun hnaia form tak Roberto Firmino vanneih zan a ni lo a, Brazilian striker goal khung ngei tur nia lang chu Baggies keeper Sam Johnstone chuan ṭha zetin a dansak - Big Sam-a'n point an hlawhchhuah theih chhanah Ajayi a ngai a nih chuan English keeper Johnstone hi en kan bik a thiang lo ang.

Liverpool hian hma erawh an hruai chhunzawm zel a, an hnuai chiaha awm Everton nen khelh zat inangah point thumin an la sang zawk a, pangana Manchester United-in match khata khel tlemin point nga lekin an phak lo bawk - Reds dinhmun a him bik lo. 

Leeds United    1 - 0    Burnley

LEU: Patrick Bamford 5' (P)

West Ham    2 - 2    Brighton & Hove Albion

WEH:Benjamin Johnson 60'; Tomas Soucek 82'

BHA: Neal Maupay 44'; Lewis Dunk 70'

 

Liverpool    1 - 1    West Bromwich Albion

LIV: Sadio Mane 12'

WBA: Semi Ajayi 82'