Lianzuala'n goal a khung ve ta

Mizo footballer chhuanvawr Lallianzuala Chhangte chuan tun season Indian Super League-a goal a khung loh reng hnuin East Bengal lakah a khung ve ta a, a club Chennaiyin FC erawh hnehna a chanpui zo lo - Kolkata club nen hian 2-2 in an inhnehtawk. 

Chennaiyin hian minute 13-na leka Lianzuala goal leh Rahim Ali-a goal hmangin vawi hnih ngawt hma an hruai hman a, mahse German midfielder Matti Steinmann chuan East Bengal tan si phurh a sut ve ve a ni. 

Lianzuala hian Jakub Sylvestr hnen aṭanga a ball hmuh chu a tlanchakna hmang ṭangkaiin a khalh lut a, goal-ah a chantir - hun tawp hnaih lamah Lunglei tlangval hian Sylvestr tan hian siamsak ve leh mah se Slovakian forward hian goal-ah a chantir ve thei lo. 

Chennaiyin tan Jerry Lalrinzuala chuan inkhel bul a ṭan bawk a, East Bengal tan minute 46-naa luhtir Jeje Lalpekhlua'n goal a la keng tel rih lo - Hnahthial tlangval goal khung hun hi Kolkata club ṭantuten nghakhlelin an thlir mek.

Pathianni zan ISL inkhelah Kerala Blasters chuan 2-0 in Hyderabad FC an hneh bawk a, Abdul Hakku leh Jordan Murray-ten tun season-a South Indian club chakna hmasa ber ni turin goal khat ve ve an khung. 

Hyderabad tan Laldanmawia Ralte chu bench aṭanga luhtir a ni a, mahse, Sialhawk Express hian inkhelah danglamna a thlen thei bik lo. 

SC East Bengal    2 - 2    Chennaiyin FC

SCE: Matti Steinmann 59', 68'

CFC: Lallianzuala Chhangte 13; Rahim Ali 64'

Kerala Blasters    2 - 0    Hyderabad FC

KEB: Abdul Hakku 29'; Jordan Murray 88'

Bengaluru FC    7:30 PM    Jamshedpur FC