A dinhmun ngaiah Novak Djokovic

Association of Tennis Pro-fessionals (ATP) chuan Thawhṭan-ni khan mipa ranking thar ber an tichhuak a, Novak Djokovic chuan point 12,900 hmuin hma a la hruai chhunzawm zel. Pahnihna dinhmun luahtu Andy Murray-a'n point 10,485 a hmuh tlin ve tak avangin Serbian thiampuipa dinhmun hi tun hma angin a nghet tawh bik lo.

Tun hnaiah kum 29-a upa Murray a khel ṭha tluang hle a, Rio Olympic hnuah pawh China Open leh Shanghai Rolex Masters-ah te a champion leh tawh. Kuminah Vienna Open leh Paris Masters bakah ATP World Tour Finals khelh hmabak an la nei a, heng inelna pathumah hian Murray hi a champion vek a nih chuan world number 1 ni chungin season a khar thei dawn tihna a ni.

US Open champion Stan Waw-rinka chu pathumna niin Wimbledon finalist Milos Raonic chu palina a ni thung. Grand Slam vawi 14 champion tawh leh mipa player zinga major titla la hnem ber Roger Federer te chungah Japan tlangval Kei Nishikori (5) a awm bawk.

Kuminah Federer a inkhel tawh dawn lo a, hei vang hian O2 Arena, London-a ATP ranking-a a sang pariat ten an khelh tur ATP World Tour Finals-a inlan turin number 9 Tomas Berdych tan kawng a inhawng mek. Hetih lai hian Berdych (3,300 points) leh Dominic Thiem (3,250 points) te hi inlehthal thei reng an la ni.

ATP Ranking

# Player Ram Points

1 Novak Djokovic SRB 12,900

2 Andy Murray GBR 10,485

3 Stan Wawrinka SUI 5,820

4 Milos Raonic CAN 4,690

5 Kei Nishikori JPN 4,650

6 Rafael Nadal ESP 4,380

7 Gael Monfils FRA 3,815

8 Roger Federer SUI 3,720

9 Tomas Berdych CZE 3,300

10 Dominic Thiem AUT 3,250