Vawiin tlai dar 5:00-ah Assam Rifles Vs MPL5 hmahruaitu
Bethlehem Vengthlang FC-in Mizoram Premier League khelh meka hmahruaitu an nih avangin Mizoram aiawhin vawiin tlai hian All Assam Rifles Football Team an hmachhawn dawn.
Tlai dar 4:00-ah programme
ṭan a ni ang a, ennawm hrang hrang a awm ang a, dar 5:00-ahn inkhelh hman beisei a ni.
Lammuala inkhel tur hi en man a awm dawn lo a, Assam Rifles-in Mizote nen inṭhian
ṭhatna an neih belh zel theih nana Mizoram Football Association nen ṭangkawpa an buatsaih a ni.
Thil thlawn ṭha si
Assam Rifles Football Team hi a hranpa a chahluh tur ni se sum
ṭhahnem tak sen a ngai dawn a, en man pawh a awm ngai ngei ang.
Tun ṭumah erawh 'inṭhianṭhatna' atana buatsaih a nih avangin Assam Rifles thuneituten an 'football team'
ṭha ber Shillong-a innghat hi an chah lut - hei hi kumina inelna panga an hmachhawn tawha pathuma champion thei Assam Rifles inkhel a thlawna en theihna chhan a ni.
Tlaia inkhel hi en man awm lo ni mah se Assam Rifles-in an team neih ṭhat ber an theh chhuak tih hriat a ṭha a, MFA lamin MPL5 hmahruaitu Bethlehem Vengthlang an chhawp chhuak ve bawk.
Santosh Trophy Top Scorer
Assam Rifles hian kum nga liam ta khan kum 175-na lawm nan Shillong Lajong nen friendly match khelin NorthEast club zinga I League khel hmasa ber hi 3-2 chauhin an chak. Lajong nena inkhel tawk Assam Rifles hi team ṭha an ni tih a chiang.
Kum 2016 chhungin inelna chi hrang pangaah an inlan tawh a, heng zinga pathumah hian an champion thei hial a ni.
2010 Santosh Trophy-ah khan Assam striker Akum Ao chuan goal kua khungin top scorer a ni a, tuna Assam Rifles player pawimawh ni zui ta hnaih bertu Punjab striker Balwant Singh-a'n (Mohun Bagan) goal riat a khung. Assam Rifles-ah hian Akum Ao bakah captain Thang Kuki leh M Chhetri te'n BVT tlarhnung tan harsatna an siam thei bawk ang.
Thawhṭanni khan Assam Rifles-in Mizoram an rawn thleng a, nimin zing khan AR Ground-ah training an nei nghal.
Team manager Roshan chuan, "Team ṭha ber anga inchhal chu ka duh lo a, amaherawhchu team ṭha tak chu kan ni. Mizoram club ṭhat zia kan hria a, an khel erawh kan la hmu lo. Mizo mipui hmaa kan thiamna pholan hi kan duh a ni," tiin Vanglaini palai a hrilh.
Assam Rifles tan hian mizo tlangval pahnih North Vanlaiphai tlangval Biaksangzuala (striker) leh Seling tlangval Lalrinchhana (winger) te an inlan ngei rin a ni a; Biaksangzuala hi chu MPL tir lamah khan a lo inlan tawh a ni.
BVT Thar
MPL5 ṭan hmain Bethlehem Vengthlang FC hi mi ṭhenkhat chuan tla turaah an ngai hial a, inelna ṭan a nih hnuah erawh Lammualah hneh loh an tawng lo. Lalbiaksanga Colney hote hi MPL5-ah vawi khat chiah an chak lo a, Chhangphut Field-ah chiah hneh loh an tawng.
Vawiin hian BVT-in player
ṭha zawk an rawn pho chhuak dawn a, Ramhlun FC aṭanga an lakluh Lalnunmawia'n inkhel bul a ṭan nghal ang.
India junior international hlui Ramhlun South tlangval Mawitea'n BVT captain Laldingngheta a thlawp tur chu a hmuhnawm tham ngei a rinawm.
Mizoram aiawha khel tur BVT hian vawiin hian Mawitea bakah player thar dang an pho chhuak a nih pawhin thil mak a ni dawn lo - champion tum club hian an squad thuam chak ngei tumin player an zawng zel.
BVT coach BS-a Colney chuan, "MPL5 chawhnu lam khelh ṭan leh hmaa friendly match ṭha tak kan khel thei tur hi kan lawm takzet a, chak ngei tumin kan khel bawk ang," tiin Assam Rifles hneh an tum thu a sawi.