Anfield-ah Mourinho leh United an dawihzep

Thawhṭanni zana Liverpool leh Manchester United inhmachhawn hmain boruak sang viau mah se Anfield-ah beisei ang inkhel hmuh tur a awm lo a, team pahnih hi goal khung loin an inhnehtawk.

Premier League inkhela ngaih-ven hlawh bera chhal ngamah hian player langsar Philippe Coutinho, Roberto Firmino, Paul Pogba leh Zlatan Ibrahimovic te inlan mah se a tawpa langsar ber chu United keeper David de Gea a ni.

Spanish goalkeeper hian Emre Can-a goal shot chu hnai set sawtah ṭha takin a dan sak a, yard 25 vel
aṭanga Coutinho goal shot ropui chu a hming chher nan a hman sak bawk. Kum 25-a upa Spanish goalkeeper hi Brazilian midfielder goal shot dang tur hian a thlawk a ni ber!

Jurgen Klopp-a enkawl team hian a zawna a vawi nga nan hnehna chang ngat se chuan Premier League table chung lamah Manchester City nihrual thei tur an ni a, mah se German coach hmaah Jose Mourinho-a'n a lo hlawhtlinpui tawh ṭhin defensive game a hlawhtlinpui a, point hnih hloh ni loin point khat hlawh chhuak an ni.

Mourinho a hlawhtling

Anfield-a inkhelah manager hlim zawk thlan tur nise Jose Mourinho-a'n vote a hmu sang zawk ngeiin a rinawm. Inkhel tawp hamrik a rik rualin Klopp-a'n Liverpool fan-te hnena lawmthu sawi turin khelmual pan mah se a hmel enin a hlim lo tih hai rual a ni lo a, German coach hian chak a duh a ni.

Klopp-a hnuaia an game-ah Liver-pool an tlan tam ṭhin a, an goal nawr natna chhawr ṭangkaia Arsenal leh Chelsea khualmuala an hneh bakah an mikhual Leicester City leh Hull City lakah goal kua ngawt an khung bawk. Mahse, United lakah erawh Liverpool-in Klopp-a ruahman angin an khel chhuak thei lo a, Reds goal nawr na tak ṭhin kha hmuh tur a awm lo - United tlarhnungin an dang chat hneh tlat.

Ander Herrera chu midfield laiah United tan innghahna a ni a, Spanish midfielder hian a hnathawh tur ṭha taka thawkin hun tam zawk chu Coutinho leh Firmino te a dah ṭha thei. United tan Antonio Valencia a khel ṭha bawk a, kum 31-a upa right back hian Firmino-a pet goal tur nia ngaih a tackle hman chu player naran tan nang hman chi a ni lo.

Portuguese manager Mourinho-a'n hman aṭanga a lo hlawhtlinpui tawh ṭhin defensive game a hlawh-tlinpui a, inkhel hmuhnawm chhawp-chhuak lo mah se a duh ang tak point a hlawh chhuak - United hian inkhelh chhung zawngin 35% ball an chang a, 2003-04 season
aṭanga statistics mumal taka kalpui a nih hnua United-in ball an chan tlem ber ṭum a la ni.

Khawiah nge Pogba?

Mi tam takin Paul Pogba lakah beiseina a sang lutuk niin an sawi
ṭhin - mah se khawvela player manto ber nih a, a man zata club pakhatin pound maktaduai 89 an seng ngam tawh a nih chuan French midfielder lakah hian beiseina a sang tur a ni.

Thawhṭanni zana inkhel boruak sangah Juventus midfielder hlui hi che ṭha ngat se chuan season tir a hman chhiat zawng zawng thai bo thei tur a ni a, mah se ṭum dang ang thoin Pogba hmuh tur a vang a, tun thleng chuan United-in pound maktaduai 89-a an lei ngam hi thil mak a la ni reng.

Hetihrual hian Pogba hi inkhel pumpui aṭanga thai bo ngawt erawh a fuh bik lo. Kum 23-a upa midfielder hian second half-ah ṭha taka ball a insiamrem chawp hnuah Ibrahimovic tan ball duhthusam a siamsak a, mah se Swede striker hian amah ang lo takin a tauh goal thei lo.

Manager thukhawchang

Liverpool manager Jurgen Klopp chuan, "Ka hnual hran lo a, mah se kan result vanga hlimna tur erawh ka hmu chuang lo. Kum 10 emaw 20 liam hnuah zanina kan inkhel ang kha chu an sawi tawh dawn lo a, tuman an en peih tawh lo ang," tiin game hriatreng tlak a an khelh loh thu a sawi.

Klopp chuan sawi chhun-zawmin, "Ka naute khan goal hlawh-chhuah ngei an duh a, kan theihna ang taka kan khel chhuak thei lo erawh a pawi a ni. Khatiang defensive game-ah kha chuan khelh a harsa ṭhin. Keini aiin tharum an ngah zawk a, first half-ah khan ṭul loah tha kan seng nasa a, second half-ah pawh kha aia ṭha zawka khel thei kan ni," tiin a lawm lo tih hai rual a ni lo.

Manchester United boss Jose Mourinho chuan, "Liverpool hi khawvela thil mak thleng hnuhnung ber ang maiin an sawi ṭhin a, mah se media ten an sawi ang em em chu an lo ni lo! Duhthusama result ṭha ni lo mah se khualmualah point thum hlawh chhuak thei kan khingpui kan dang chat a, result chhe tak a ni hran lo," tiin an khingpui Liverpool a kap nghal.

Portuguese manager chuan, "Team pahnihin game harsa tak kan khel ve ve a, mah se keini aiin anni kha an talbuai zawk. Tactical taka kan thlir chuan game kha kan thunun lo a ni mai thei a, mah se rilru puthmangah min phak lo a ni. Zanin kha Anfield-a ka kal tawh zawng zawngah a reh ber ṭum a la ni hial ang," tiin a ṭawng ngeiawm hle.

Inkhel Chhehvel

• September, 2005 hnua Liverpool leh United goal awm loa an inhnehtawk leh hmasak ber a ni.

• United-in point 14 an hmu tawh a, Mourinho-a'n kum 2001-a União de Leiria a enkawl hnua a club thara league match hmasa pariata point a hmuh tlem ber ṭum a la ni.

• United-in season hmasa khan match riat hnuah point 16 an nei a, Louis Van Gaal hnuaiah aiin Mourinho hnuaiah bul an ṭan chhe zawk tihna a ni.

• Liverpool-in Klopp-a hnuaia an Premier League home match 18-ah goal chhuah loh vawi hnih chiah an nei a, hei hi United lakah ve ve a ni.

• Ibra-a'n Premier League-a a shot hmasa 15 aṭanga goal li a khung hnuah a shot hnuhnung 26-ah goal a la khung leh lo.