Bayern coach Ancelotti tan fiahna
Carlo Ancelotti-a'n Bayern Munich a enkawl hnua a match hmasa pariatah hnehna a chanpui vek a, club record thar an siam. Italian manager hi a chet ṭhat vanglaiin Altetico Madrid lakah 1-0 in an tlawm a, Bundesliga lamah FC Cologne leh Eintracht Frankfurt te an inhnehtawk pui zui bawk. Zanin dar 12:15 hian PSV Eindhoven an lo mikhual dawn a - manager tawnhriat ngah tan fiahna a ni ang.
Champions League Group D hmahruaitu Atletico Madrid chu FC Rostov khel turin an zin chhuak dawn bawk a, Russian club tan Spanish La Liga hmahruaitu lo mikhual hi a chak awm loh tawp ang; Diego Simeone a naute hi Barcelona leh Real Madrid chunga awm mek an ni tlat.
Fiahna
A zawna season thum chhung Champions League semifinal aṭanga pet chhuah an nih hnuah Bayern-in tun season-ah beiseina an nei sang a, an match hmasa zawkah Atletico lakah 1-0 in tlawm mah se FC Rostov chu 5-0 in an sawp leh tawh.
Zanina an inkhelhna tur hmun Allianz Arena hi Cham-pions League inelna bikah chuan mikhual tan hmun ralṭi a ni. Bayern hian an mikhual hnuhnung team 13 zet chu an lo hneh thei a, tun hma aṭang tawhin Dutch club bik phei hi chu vawi kua an mikhual tawh aṭangin vawi sarih an hneh a, ṭum hnih inhnehtawkin chak loh an nei lo.
Kartawp Bundesliga inkhel-ah Robert Lewandowski chu bench-ah hahchawlhtir a ni a, Poland international hian a club leh ram tana a match hnuhnung 13 aṭangin goal 14 a khung thei. Ani bakah hian Frankfurt laka goal hmahruai khungtu Arjen Robben leh Joshua Kimmich te hi ven uluk ngai bik tur an ni. Duth forward Robben hi dam kawr a ni a, German rawlthar Kimmich hian a club tana a match hnuhnung pasarihah goal ruk a khung thei thung.
Dutch champion PSV Ein-dho-ven hian an match hmasa zawkah Rostov an draw a, zanina an khingpui tur Bayern ang thoin Atletico an hneh lo thung - group stage paltang an duh a nih chuan Allianz Arena-a point hmuh a pawimawh ang. Anmahni khelmuala match 22 chhung zet tlawm loa an kaltuan tawhna boruak ṭha hi Germany-ah an chhawm thei a nih chuan mikhual tlangnel ni thei turin theihna an nei.
Sulhnu
Team pahnihte hi tun hmain vawi ruk an inhmachhawn tawh a, Bayern hian sulhnu nei ṭha zawkin vawi li hnehna an chang. Vawi khat chu inhnehtawkin PSV chak chhun erawh an intawn hnuhnun ber ṭum 1999/2000 Champions League kha a ni thung.
Bayern Munich hian an-mahni mual bikah PSV an mikhual vawi liah vawi hnih hnehna an chang a, tlawm an nei lo. Hetihlai hian PSV erawhin Bundesliga club lakah sulhnu an nei ṭha hran lo, vawi 18 an zin chhuah tawhah vawi khat chiah hnehna an chang a, ṭum 13 zet chu a chak lo zawkah an ṭang.
Team ṭha Atletico
Bayern Munich leh PSV an hneh zawn tawh avangin Atletico tan Champions League vawi khat khelhna Rostov hi khingpui huphurhawm tak an niin a rinawm loh - an vawi khat intawnnaah hian sulhnu nei ṭha hnut chhiah thei zawk tura ngaih an ni.
Argentine manager kaih-hruai Atletico hi match 10 chhung tlawm loin an kaltluang mek a, league match sarih a khelh aṭanga goal ruk khung thei Antoine Griezmann hi Rostov tlarhnung dawltute tana ven uluk ngai bik tur a ni ang.
Atletico Madrid hian tun hma aṭang tawhin Russian club lakah record an nei chhe hran lo hle a, vawi sarih an hmachhawn tawhah ṭum thum hnehna changin vawi hnih an inhnehtawk pui laiin ṭum hnih chak loh an nei.