A club tan Didier Drogba khel duh lo

Chelsea legend Didier Drogba chuan a club khelh mekna Montreal Impact tan inlan a duh lo niin coach Mauro Biello chuan a sawi. Kum 38-a upa striker hi Major League Soccer playoff hmun ruak chang tura a club khelhna Impact leh Toronto 2-2 a an inhnehtawk ṭumin stadium-ah a hmel hmuh tur a awm lo a ni.

Montreal hian a tirah chuan Drogba hi a hnungzang na vanga inlan lo angin an sawi a, mah se inkhelh zawhah Biello chuan, "Drogba hi bench aṭanga tlan lut turin ka ti a, mahse a duh lo. A tawpah phei chuan player 18 zinga tel loh a thlang ta hial zawk a ni," tiin thudik a sawi.

Canadian coach chuan sawi chhunzawmin, "A hnung lamah hliam a tuar tih hi a dik a, mah se inkhel tur khawpin a dam ṭha a ni. A chunga hmalak zel dan tur chu thuneitute chungah ka dah," a ti.

July 2015-a Chelsea chhuah-santu Drogba hian Impact match hnuhnung pali a match hnihah substitute anga chhawr a ni a, tun season-ah match 21 inlanin goal 10 a khung tawh.