Kyrgios an hrem

Mipa tennis singles number 14 Nick Kyrgios chu chawlh kar riat chhung inkhel thei lo tur a hrem a ni. Shanghai Masters-a nungchang mawi lo a lantir vang hian Australian star hi pawisa chawitir a lo ni tawh bawk.

Mipa tennis lama thuneitu sang Association of Tennis Professionals (ATP) in an hremna hi kar tin chhiar tur a ni lo a, tournament khelh kar chauh chhiar tur a nih avangin nakkum Janaury 15 thleng a awh ang.

Kum 21-a upa Kyrgios hi Mischa Zverev lakah a chak dawn loh tih a chian hnuah inkhel ngaihsak lo tak angin a awm vel a, fans ṭhenkhat a inhnial buai pui bakah umpire a hnial pui bawk.

Kyrgios chuan, "Fan-te chungah ngaihdam ka dil a, Shanghai-ah khan ka taksa bakah ka rilru put hmang kha a dik lo a ni. ATP thutlukna ka zah em em a, hetianga season khar hi chu ka duh dan a ni bik lo," tiin a sawi.

Theihna sang tak nei ni mah se Kyrgios hi a nungchang vangin a buai fo a, kum 2015 khan Stan Wawrinka bialnu mawi lo taka a lo sawi avangin ni 28 chhung an lo hrem tawh a, Wimbledon leh US Open-a a nungchang mawi lo vangin Australian Olympic Committee chuan Rio Olympic-a inlan turin an duh lo tawh bawk.