Mascherano-a'n contract pawt sei

Javier Mascherano chuan Spanish champion Barcelona tan kum 2019 June thla thleng cham chhunzawm turin Thawhṭanni khan a contract a pawt sei. Argentina international hian Catalan club tana a contract ziah hnuhnung ber tur a nih thu a sawi chhuak zui nghal bawk.

Midfielder ni chung sia defender atana an hman ṭhin Mascherano hian Barcelona tan kum sarih chhungin match 290 a khel a, nomawi 17 zet a chawi tawh. Mascherano-a'n contract a ziah ni hian club president Josep Maria Bartomeu, sporting vice president Jordi Mestre leh technical secretary Robert Fernandez te an tel.

Kum 32-a upa Mascherano chuan, "Hei hi helai hmuna ka contract hnuhnung ber a ni tawh ang. He hmunah hian football ka chawlhsan hnuah pawh ka la kir leh ṭhin ngei ang a, hun nuam leh hlimawm min hman tirtu a nih avangin ka tan theihnghilh theih a ni tawh ngai lo ang," tiin Liverpool aṭanga a zawm tak club chungchang a sawi.

Mascherano hian Argentina tan pawh match 133 zet a khel tawh a, Copa America-ah ṭum nga inlan tawhin ṭum thum zet final lut mah se pahnihna an ni vek thung. 2014 Brazil FIFA World Cup-ah khan final hruai thleng bawkin Germany lakah 1-0 in a vanduai zawkah an ṭang bawk.