Pune-in Blasters an chelh

Thawhṭanni zan Indian Super League inkhelah Pune City leh Kerala Blasters an inhmachhawn a, goal khat ve ve khungin an inhnehtawk. Mikhual team Blasters tan Cedric Hengbart chuan Indian Super League-a goal rang ber ni turin minute 3-na lekah a khung a, awlsam takin an chak dawn niin a lang.

Mahse, second half-ah Pune tan Eidur Gudjohnsen inhliam vanga Maharashtra club zawmtu Mo-hamed Sissoko a inlar a, Liverpool leh Juventus midfielder hlui hian minute 68-naah an si phurh sutna goal khungin point khat hlu tak a team tan a hlawh chhuak.

Kerala coach Steve Coppel chuan, "Khualmuala inkhelh harsat zia hi coach zawng zawngin an hre vek ang. Hma taka goal kan khung avang khan ka lawm a, mah se kan goal venhim kan tum luatah point khat bak kan hlawh chhuak zo ta lo a ni," tiin goal khung tuma a player te an ṭan tawk loh thu a sawi.

Pune City assistant coach Miguel chuan, "Hmasawn zawngin kan kal zel a, chak zo lo mah ila point kan hlawhchhuah avangin kan lawm a ni. Ka ngaihdanah chuan kan khel ṭha zawk a, chak kan phu. Tun aia nasa zawkin kan thawk zel ang a, kan match khelh leh tur atan kan in-buat-saih nghal ang," tiin a sawi ve bawk.