Nou Camp-ah Pep leh City leng dawn

Zanin dar 12:15 hian Barcelona-in Nou Camp mawina leh ropuina belhchhahtu Pep Guardiola leh Manchester City an mikhual dawn a, Livepool leh Manchester United inkhelh ṭuma Jose Mourinho 'defensive game ninawm' vanga meng rei thlawna inngai tan pawh men nawn leh sakna tlak inkhel a ni ang.

Champions League Group C-ah Barcelona (6 Pts), Man-chester City (4), Celtic (1) leh Borussia Monchengladbach (0) te dah khawm an ni. City hian an match hnuhnung bera Celtic an draw avangin Catalan Club hi an hneh lo a nih chuan Pep Guardiola hote hmalam chu a khirh ve khawp ang.

Barca fapa Pep

Catalan naupang kum 13-a upa chuan La Masia a zawm a, he naupang hi January 18, 1971-a piang niin a hming chu Pep Guardiola a ni. Dutch manager ropui Johan Cruyff-a'n midfield ding lam sira a tlan lai a hmuhin youth manager Charly Rexach hnenah midfield laia khelhtir turin thurawn a pe a, Cryuff-a hmuh dan a sual lo.

Dutch manager hian kum 1990 khan Pep hi Barcelona senior team tan a khelhna hun a siamsak a, Spanish tlangval hi midfielder ṭha bik ni chhoin Catalan club chauh ni loin Spain team tan hial captain armband hreng pha a ni.

Pep hian coach hna a chelh hnuah pawh Barcelona tan a thawh hlawk zel a, La Liga nomawi vawi thum a chawi pui bakah Champions League vawi hnih a chawi bawk. Spanish manager hian Catalan club hi nomawi 14 zet a chawi pui a, a ropui lai chu attacking football khel chunga a hlawhtling hi a ni. Guardiola hian Xavi leh Iniesta te mil turin 'Tiki Taka' khelh dan hmang chu a tinung thar a, Lionel Messi an neih bawk avangin sawi uar deuhin 'khawvel team awm tawh a ṭha ber' tiha an sawi a nih pawhin dem theih an ni lo.

Barca hmelma Pep

Catalan club-in an duh reng laiin Pep-a'n hmangaih hmasa kalsanin kum khat a awl hnuah Bayern Munich a zawm a, Barcelona
ṭhatna duh ṭhin khan an ropuina
aṭanga Catalan club hnuh hniam chu a tum zinga pakhatah a ngaih theih. Amaherawhchu Pep-a kaihhruai Bayern chu Champions League semifinal-ah Barcelona lakah an mualpho a, German club hi Nou Camp-ah 3-0 in an mualpho. Hei chauh hi a ni lo, Bayern hian goal zawnah an pet lo a, semifinal aṭangin an tla bawk.

Pep hian Bayern Munich chu season thum chhunga Bundesliga nomawi a chawi pui vek bakah nomawi dang pali lak pui mah se Champions League-ah ber a champion loh avangin hlawhchham ang hiala chhuah a ni. Heti chung hian Manchester City-in Europe-a hlawhtlin an duh vangin Manuel Pellegrini an ban a, Pep an lalut. City leh Spanish manager duh chu Champions League nomawi a ni a, Barcelona nen an thil tum a inan chiah avangin Catalan fapa rangkachak ṭhin kha hmelma ang hialah a ngaih theih ta.

City chu le...

Guardiola kaihhruai City-in an khingpui zawng zawng a zawna match 10 an hneh hnuah Celtic an draw a, league-ah Tottenham hneh lo zuiin an match hnuhnung berah Everton lakah point khat chiah an hlawh chhuak bawk. Toffees an draw
ṭum hian City innghahna Kevin De Bruyne leh Sergio Aguero ten penalty an hlah ve ve a, tun season-ah Pep-a hote hian penalty vawi riat hmu tawhin a chanve chiah goal-ah an chantir.

Amaherawhchu City tana lawmna tur chu Everton an khelh ṭumin captain Vincent Kompany chu bench aṭangin a rawn tlan lut a, Belgian defender hi September 21-a Swansea an khelh ṭuma inhliam a ni. Hei chauh hi lo, Barcelona an hneh theih tih hrechiangtu Nolito-a'n Toffees lakah siphurh sutna goal a khung bawk.

Season liam ta khan Celtic-in Barcelona 4-1 in an sawp a, Nolito hian goal hmahruai a khung bakah Iago Aspas goal hnih khung tur a siam sak bawk. Spanish forward Nolito chuan, "Kan tlan tam a ngai a, ball kan chan tam a ṭul a, ani aiin goal kan khung tam a ngai. Khawvel club ṭha zinga chhiar tel kan duh a nih chuan Barcelona hi kan el phak a ngai. Kan khingpui te hi kan zah tur a ni a, kan hlau tur erawh a ni lo. Kan hmaa ding hi kan hneh thei vek a, chung zingah chuan Barcelona hi an tel a ni," tiin an chak theih thu a sawi.

Barcelona ve thung

Catalan club hian City hi vawi li an hmachhawn tawh a, an hneh vek. Barcelona hian kartawp inkhelah Deportivo 4-0 in an sawp a, hemi ṭum hian damkawr Lionel Messi leh Luis Suarez-a ten goal khat ve ve an khung.

Barcelona coach Luis Enri-que chuan, "Pep nen kan inbe lo a, hei hi City nena kan inkhelh tura inpuahchahna ṭha tak a ni. City hian an coach zarah nasa takin hma an sawn a, kan khelh dan tur chungchangah engmah sawi lawk ka duh lo," tiin inkhel tur chungchang a sawi.

Tun season-ah Barcelona-in goal 40 an khung tawh a, goal khung tawh player 10 aṭangin goal kua ve ve khungtu Messi leh Suarez bawk hi City tana ven ṭul tur a ni. Anni pahnih bakah hian MSN tikimtu Brazil captain Neymar an la awm cheu bawk a, City hmabak a awlsam thei lo.