US sumdawng kutah Marseille

French Ligue 1 club Marseille chu American sumdawng hausa Frank McCourt-a'n pound maktaduai 40.6 in a lei. Los Angeles Dodgers neitu hlui McCourt hian a club thar tan hian kum li lo kal turah pound maktaduai 180 zet theh chhuak turin ruahmanna a nei.

Ligue 1 champion vawi kua ni tawh Mar-seille hi season hmasa khan 13-na an ni a, tun season kal mekah match kua khelh tawh aṭanga point 12 hmuin 12-na an ni mek - hmahruaitu Nice an phak lohna chu point 11 zet a ni der tawh.

Kum 63-a upa Mc-Court chuan, "Olympique de Marseille tan bung thar kan kai ta. He club-in tun hma lama a lo ropuina ang kha nei let leh turin theihtawp ka chhuah dawn a, chumi tur chuan fans puihna kan mamawh. Tun hnaiah khelmual chhung leh pawnah chanchin duhawm lo a neih ṭhin pawh tih reh kan tum ang," tiin a sawi.

Marseille hian 2009–10 season-a league nomawi an chawi bak kha hlawhtlinna an la tawng leh lo a, tun hnaiah Paris Saint-Germain an len tak em avangin an tan champion ngaihna a awm meuh lo a ni ber, neitu thar an neih takah chuan beiseina thar an neih phah ngei ang.