Manchester City sum lakluh a pung

Manchester City chuan 2015-16 chhung khan pound maktaduai 391.8 an lalut a, an club sum lakluh punna zat hi 11.4% niin kum khat chhunga an hlawkna zat hi pound maktaduai 20.5 a ni. City chairman Khaldoon Al Mubarak chuan, "Player leh coach ṭha tak kan nei a. khelmual pawn lam chenin England leh Europe-a thil ropui thlentir turin theihna kan nei a ni," tiin a hlim hle.

City hian kum 2014-15 aia 2015-16 a an match khelh nia sum an lakluh zat ringawt hi 21% in a pung a, a zat hi pound maktaduai 52.5 a ni. City hian an inkhel pek chhuahna aṭang ringawtin pound maktaduai 161.4 an hlawh chhuak a, a punna hi 19% a ni. Club sumdawnna hrang hrang
aṭanga an lakluh hi 3% chauhin a pung thung a, pound maktaduai 177.9 an lalut. City hian player lei nen kum khat chhungin pound maktaduai 140 an hmang a, tunah hian leiba an nei miah lo bawk.

Sheikh Mansour-a'n September, 2008 khan Thai sumdawng hausa Thaksin Shinawatra hnen aṭangin City hi a lei a, kum riat chhung chu a zawnin club sum lakluh hi a pung tawh. Kum nga liam taah kha chuan City hian pound maktaduai 194.9 an hloh a, tuna an dinhmun nen hi chuan inthlau tak a ni.

City sum lakluh zat chhut kumah hian Etihad Stadium chu mi 8000 dang len belh tura duan niin mi 54,041 an leng tawh a, club enkawltu company City Football Group-ah pound tluklehdingawn 3 sumdawnna neitu China Media Capital Holdings chuan pound maktaduai 265 an invest bawk.