PV Sindhu inkhel leh dawn ta

Rio Olympic silver medallist Pusarla Venkata Sindhu chu tunkar chhunga khelh tur 2016 Denmark Open Superseries Premier bad-minton tournament-ah a inlan dawn. Indian shuttler hi seeded parukna niin vawiin hian Chinese nula He Bingjiao nen a match hmasa berah an inhmachhawn ang.

Indian hmeichhe zinga Olym-pic silver medal dawng thei hmasa ber Hyderabad nula hi Rio de Janeiro aṭanga a rawn haw hunah thla khat leh a chanve dawn chu a inkhel ta lo a, world number 1 hlui Saina Nehwal chu hliam vanga a chlawh mek avangin Sindhu hi India beiseina lian ber a ni mek.

Kum 21-a upa Sindhu hian hnehna a chang chho zel a nih chuan khawvela player langsar ber ber Ratchanok Intanon, Sung Ji Hyun leh Tai Tzu Ying te a hmachhawn a ngai dawn. Anni bakah hian world number 1 leh Rio Olympic final-a a hneh loh ni bawk Carolina Marin a inlan dawn bawk - Sindhu tan inelna hautak a inṭan chho dawn.

World Championship-a bronze medal vawi hnih dawng tawh Sindhu chuan, "Olympic khan inrintawkna min pek belh nasa hle a, tun hma zawng ai khan ka mawhphurhna pawh a sang sawt bawk. Mite hriat ka hlawh tak avangin ka chungah beiseina a sang tih ka hria a, tih hlawhtlin zel ka tum ang," a ti. First round-a a hmachhawn tur Bingjiao nen hian vawi li inhmachhawn tawhin ṭum thum hnehna a chang.

Mipa singles lamah Dutch Open Grand Prix final-a chak lo hlim Ajay Jayaram a inlan dawn bawk a, hetih lai hian Rio Olympics quarter finalist Kidambi Srikanth erawh hliam vangin a la inlan dawn lo thung.