AFC CUP Bengaluru tan bung thar kaina hun tha

Zanin dar 7:00-ah Bengaluru FC chuan Indian football chanchin ziah danglam theihna hun ṭha an nei dawn - AFC Cup semifinal-ah champion lai Johor Darul Ta'zim an mikhual dawn a, I League champion hian Malaysian club lakah goal an chhuah lo a nih chuan Indian club zinga Asia club football inelna sang ber dawttua final lut hmasa ber an ni dawn a ni.

Bengaluru hian semifinal first leg-ah JDT hi khualmualah Eugeneson Lyngdoh goal ropui hmanga 1-1 a an inhneh-tawkpui tawh avangin an dinhmun a ṭha zawk a, away goal an neih sa avangin goal an chhuah loh chuan final an lut thei dawn - inkhel hi Star Sports 1-ah live-in en theih a ni ang.

Chhuantea a dam lo

Bengaluru-in an squad-ah Mizo panga goalkeeper Lalthuammawia Ralte, defender Lalchhuanmawia Fanai, midfielder Beikhokhei Beingaichho, Malsawmzuala leh striker Daniel Lalhlimpuia te an kawl a, Lengpui left back Chhuan-tea hi hliam vang-in a la inlan thei dawn lo.

ISL-a Mumbai City tana khel tur Chhuantea chuan, "Dam chiang var tur hi chuan kar hnih vel ka la mamawh dawn a, zaninah pawh ka la inlan thei lo ang. Kan team-a Mizo dang zingah hliam tuar emaw, harsatna nei an awm hran lo a, anni chuan training ṭha takin an nei thei vek a ni," tiin Vanglaini palai a hrilh a, zanina inlan tur erawh engmah tih chian a la nih loh thu a sawi.

Dinhmun ṭha

Malaysian club ṭhain hrem vangin Argentine striker ṭha pahnih Jorge Rolando Pereyra Díaz leh Juan Martin Lucero an chhawr thei dawn lo a, tun season-a an pahniha goal 30 thun tling tawh striker te tel lo tur hi Bengaluru tan chanchin lawmawm a ni.

Chhuantea chuan an khingpui tur chungchang hi sawiin, "Group stage-a match hnih kan inhma-chhawnah kan hneh lo a, mah se khualmualah kan inhnehtawk tawh avangin player ten inrintawkna nasa tak an nei a, final luh ngei kan beisei a ni," tiin beiseina sang tak an neih thu a sawi.