Europe-ah Leicester an lian
Premier League champion Leicester City-in Thawhlehni zan khan King Power Stadium-ah Riyad Mahrez-a goal hmangin Copenhagen an hneh a, match thum khelh tawhah la chak vekin hetiang zat bawk group match khelh tur la awmah hian knockout stage thleng turin vawi khat bak chak a ngai tawh lo.
Claudio Ranieri hote hian point kua hmuin Group G hma-hruaitu an ni a, England-ah Copenhagen-in point hlawh chhuak lo mah se point li hmuin pahnihnaah an awm. Porto-in khualmualah Club Brugge 2-1 a hnehin point li an hmu a, Bel-gian club Brugge erawhin point an la hmu lo.
Mahrez a nung
Premier League lamah Riyah Mahrez a langsar tawk lo a, Lei-cester City an hnufual hle. Europe lamah erawh Algerian winger Mahrez thiamna phochhuah a ni a, Foxes an la chak vek.
Copenhagen nena an in-khelh ṭum hian vei lam aṭanga Jamie Vardy cross chu pound maktaduai 29 man Islam Slimani-a'n tauh letin Mahrez-a'n hnai tak aṭangin a ke vei lamin a khung. Foxes-in tun season Champions League-ah goal nga an khung tawh a, Algerian winger hi goal liah ( 3 goals, 1 assist) a inrawlh.
Kum 25-a upa Mahrez a khelh ṭhat laiin Jamie Vardy erawhin season liam ta a la pha lo hle. English striker hi thawhrimna kawngah chuan sawiselna tur awm lo mah se goal hmaah a la vannei tawk lo, season liam taa goal 24 khung thei striker hian tun season-ah goal thum chauh a la khung.
Point 9
Premier League-ah Lei-cester City hi 13-na ni pha chauh mah se Europe-a an result erawh beisei phak bak-in a ṭha thung. Danish club Copenhagen an hneh ṭum pawh hian position hrang hrangah Leicester hi an che ṭha a, tlar-hma lamin goal an khung bakah hian tlarhnung lam goal ven kawngah an ṭangkai bawk.
Hun tawp hma hretin Danish striker Andreas Cornelius goal khung tur chu Kasper Schmei-chel-a'n a kut ding lamin a dang hman a, point thum an hmuh theih chhan pakhat a ni. Foxes manager Ranieri pawhin, "Kasper hi keeper ṭha tak a ni a, team pumpui rilru hahdam takin a khelhtir thei a ni," tiin innghahna tlak a nih thu a sawi.
Ranieri a lawm lo
Leicester City manager Claudio Ranieri chuan, "Eu-rope-a kan result avang hian ka naute hi ka chhuang em em a, Premier League ka thlir erawh chuan ka thinrim takzet a ni. Chutihrualin hei hi thil awm dan chu a ni a, inelna liana vawi khat telnaah chuan engkim a fuh vek thei lo - kal fuh lo hi a awm ṭhin," tiin lawmna famkim a neih loh thu a sawi a. Italian manager hian Barcelona emaw Real Ma-drid emaw anga team ṭha hmachhawn tur chuan an la ṭhat tawk loh thu a sawi lang tel bawk.
Premier League a ngaih pawimawh thu sawiin Italian manager chuan, "Champions League kan khelh chuan player-te an phur a, ngaihtuahna pawh an hmang tam zawkin ka hria. Amaherawhchu Premier League hi kan dah pawimawh ber a, kan rilru puthmang kan thlak a ṭul a ni," a ti.
Leicester hi league-ah vawi li an chak lo tawh a, an champion season aiin tun season match riat leka an chak loh zat hi a tam tawh zawk.
Inkhel dangah Club Brugge-in Jelle Vossen hmangin goal khung hmasa mah se mikhual Porto-in Miguel Layun leh Andre Silva te hmangin an lehthal.
Group G
Inkhel Results
Leicester City 1 - 0 Copenhagen
Club Brugge 1 - 2 Porto
Fixture - November 2 Zan
Copenhagen 1:15 AM Leicester City
Porto 1:15 AM Club Brugge
Team Dinhmun
# Team Pld W D L GF GA GD Pts
1 Leicester City 3 3 0 0 5 0 5 9
2 Copenhagen 3 1 1 1 5 2 3 4
3 Porto 3 1 1 1 3 3 0 4
4 Club Brugge 3 0 0 3 1 9 -8 0