Mizoram an chak lo

Subroto Cup Under 17-ah Lunglei High School hminga kal Mizoramin semifinal thleng mah se nimin tlai Dr BR Ambedkar Stadium inkhelah Brazil Serie A club Atletico Paranaense chu 6-1 a an hneh loh avangin final an lut zo ta lo.

Semifinal pakhat zawkah Army Boys-in Haryana 1-0 a hnehin final an lut ve bawk. Atletico Paranaense leh Army Boys ten October 22, Inrinni khian Dr BR Ambedkar Stadium, Delhi-ah nomawi an inchuh ang a, Brazil legend Rivaldo chu khuallian a ni dawn.

Mizoramin inkhel bul an ṭan fuh lo a, Brazil club-in an nawr bet nghal. Minute riatna lekah Atletico Paranaense-in goal hmarhruai an khung a, Mizoram insiamṭha hret mah se Brazil club bawkin minute 15-naah goal hnihna an khung.

Kumin Subroto Cup-a Shillong Lajong leh Mohun Bagan te ngam loh Atletico Paranaense hi Mizoram tan pawh an lian lua a, Brazil club hian goal li khung belh lehin 6-1 in an chak. Mizoram tan Zothansanga goal khat khungin awmzia a nei thui lo.

Semifinal pakhat zawkah hian Bengaluru-a innghat hmun hrang hrang aṭanga naupang ṭha lakkhawm Army Boys ten first half an thunun a, goal erawh second half minute 57-naah an khung chauh.

Hun tawp hma hretin Haryana-in penalty an hmu a, Army Boys defender-in red card hmu bawk mah se keeper-in penalty hi a dan bakah a per aṭanga an pet nawnna pawh dang lehin a team final a hruai thleng.