Xhaka nen khelhna kan inchuh - Coquelin

Francis Coquelin chuan Granit Xhaka nen Arsenal midfield laiah hmun nghet chan tuma an inelna a nasat thu a sawi chhuak.

Arsene Wenger-a hnuai-ah Coquelin hi season hnih liam ta chung khan player pawimawh a ni tawh a, September thlaa Chelsea 3-0 a an hneh ṭuma a in-hliam hnuah Gunners tan in-khel bul a la ṭan leh lo thung.

Nipui bazarah Wenger-a'n midfielder Xhaka a lalut a, Swiss international hian a ṭhat dan berin a la khel chhuak lo niin a lang. Kartawp Premier League inkhela Swansea 3-2 a an hneh ṭumin a tihsual vangin goal an chuah a, ṭul lo taka a foul vangin hnawhchhuah a ni bawk.

Kum 25-a upa Coquelin chuan, "Arsenal club-ah player langsar tak tak an tam a, a bik takin midfielder kan tam. Club lian tana inkhel bulṭantu nih kan duh a nih chuan inelna hautak hmachhawn tura kan inpeih a ngai," tiin a sawi.

Coquelin chuan sawi chhun-zawmin, "Ka tan pawh inelpui tur an awm hi a ṭha a, kan thawhrim zual a ngaih avangin hma pawh kan sawn phah hlein ka hria," a ti. France tana kum bithliah inelna hrang hranga inlan tawh player hian a khup hliam chu a dam chian tawh thu a sawi tel bawk.

Arsenal hi season ṭan nia Liverpool an hneh loh hnuah an insiam ṭha tawh a, league match riat khelh tawh aṭanga point 19 hmuin Premier League table-ah pahnihna an ni mek - an chunga awm Manchester City nen an point hmuh zat a intluk.