Old Trafford-ah Van Persie a let dawn

Zanin dar 12:35 hian Manchester United-in Europa League-ah Fenerbahce an mi-khual dawn a, Robin van Persie chu Premier League nomawi a lo chawi tawhna hmun Old Trafford-ah Turkish club jersey nen a inlan beisei a ni.

Goal ropui leh Persie

Sir Alex Ferguson-a'n an
ṭhenawm Manchester City lak aṭanga nomawi la let turin an hmelma Arsenal chu an captain Robin van Persie an chhuhsak a, Dutch striker hian 2012-13 season khan league-ah goal 26 khung nghalin Manchester United a champion pui.

United-in English League title 20-na an nemngheh nan Van Persie-a'n Aston Villa lamah April 22, 2013 khan goal ropui a khung a, Sir Alex phei chuan 'goal of the century' tiin a sawi nghe nghe. Van Perise chuan, "Kha goal ka ngainatna em em chhan chu a phena chanchin tam tak a awm kha a ni," tiin a sawi a, Arsenal a-
ṭanga league nomawi chawi duh vanga United zawmtu tan chuan chanchin a tam ngei ang.

Van Persie hi Scottish manager Ferugson-a hnuaiah vul mah se David Moyes hnuaiah ngai a awh tawh lo a, a hnampui Louis van Gaal-a'n a chunga rinna a nghah zawh loh hnuah Turkish club hnenah hralh chhuah a ni.

Khual ṭha a ni tlat

Manchester United supporter-ten an player hlui te lakah ṭhat an chhuah ṭhin a, Van Persie phei chu league nomawi an chawi hnuhnung bera player pawimawh a nih avangin lawm a hlawh lehzual ang.

United captain Wayne Rooney chuan, "Fenerbahce kan hmachhawn huna ka ṭhianpa leh ka khelhpui hlui ka tawng tur hi ka phur tawh a ni," tiin instagram lamah a ziak.

Engtin zel?

England captain Wayne Rooney hi ram leh club lamah sawisel hlawh mah se kum 31-a upa striker hian inkhel turin kum tam a la neih thu a sawi a, match zawng zawng khel thei turin a inpeih thu Livepool nena an inhnehtawk zawhah a sawi bawk.

Manchester United-in Fenerbahce an hmachhawn zawh hian October 23, Pathianni khian Stamford Bridge-ah Chelsea an tlawh dawn. Hei chauh hi a ni lo, October 26, Nilaini zanah Manchester City nen League Cup Last 16-ah an inhmachhawn dawn bawk.

Liverpool hmachhawn zo hlim Jose Mourinho-a'n Turkish club hmachhawn turin a squad chhahna a hman ṭangkai a rinawm a, Spanish keeper David de Gea bakah Paul Pogba leh Zlatan Ibrahimovic ten inkhel bul an ṭan a rinawm lo zawk.

United tan captain Wayne Rooney-a'n inkhel bul a ṭan hmel a, Michael Carrick, Juan Mata leh Henrikh Mkhitaryan te pawh a inlan ngei rin a ni. Hetihlai hian Inrinnia training-naa inhliam Anthony Martial leh Morgan Schneiderlin te an dam chian hman a rinawm loh.