Kar 80 chhung number 1 ni thei Mirza

Women's Tennis Association ranking thar berah Sania Mirza chu hmeichhe doubles-ah number 1 a nih chhunzawm zel, India star hi chawlhkar 80 chhung zet a chung berah a awm ta.

Kum 29-a upa Mirza hian point 8885 hmuin hmahruaitu a ni zel a, amah hnaih bertu Martina Hingis chuan point 8560 a hmu thung. Mirza hi Hingis nen an ṭandun lai aṭanga number 1 ni tawh hi a ni a, Swiss hranghlui nen an inkawp lai hian a zawna match 41 chhung zet hnehna changin thla 12 chhungin nomawi 13 an chawi hman.

Mirza hi Hingis nen an inṭhen hnuah August thla aṭang khan Barbora Strycova nen an ṭangdun zui a, Cincinnati Open leh Volvo Car Open-ah an champion leh der tawh.

Twitter kaltlangin Mirza chuan, "WTA number 1 kar 80 chhung zet a zawna ka ni thei hi ka lawm a, ka tan chuan zinkawng ngaihnawm leh hlu bik a ni," tiin a sawi.