Delhi khawpuiah goal a sur

Thawhlehni zan Indian Super League inkhelah Delhi Dynamos chuan Mumbai City an mikhual a, he inkhelah hian goal ruk zet lutin team pahnih hi 3-3 in an inhnehtawk!

Jawaharlal Nehru Stadium, New Delhi-a mipui 15,000 chuang pungkhawm hmaah mikhual team Mumbai City an tlangnel a, Hungary international ṭhin Krisz-tian Vadocz chuan first half chhungin Mumbai tan goal hnih a khung hman a, goal dang lut loin chawlhlawk hman a ni.

Italian legend Gianluca Zam-brotta enkawlna hnuaia khel Delhi-in chawlhlawk laiin thu ṭha an ngaithla tih a chiang a, Ghanaian striker Richard Gadze chuan minute 51-naah mualneitu team tan goal khat a khung. Mahse, Mumbai bawk an inlar leh a, Sony Norde chuan minute 69-naah chak an tum tih nemngheh nan an goal thumna a khung.

Team tam tak tan hnualna hun a ni tawh a, Delhi erawh an hnual ve lo. Substitute Badara Badji leh Marcelinho penalty chhuih luh hmangin an si phurh an sut zo a, huai-sen taka an khelh rah sengin point khat hlu tak an hlawh chhuak - Delhi penalty hi an goal hmasa ber khungtu Gadze hlawhchhuah tho a ni.

Delhi Dynamos tan a vawi khat nan Aizawl FC keeper hlui Soram Poirei chuan inkhel bul a
ṭan a, Lalchhawnkima chu ṭum dang ang lo takin bench-ah dah ni mah se substitute bench aṭang hian tlan luhtir leh tho a ni. Tun season ISL-ah Delhi tan Hmunhmelṭha tlangval Lalruatthara a la inlan lo a, Mumbai City lamah David Lalrinmuana pawhin bench lamah hun hmangin Lalhmangaihsanga Ralte chuan inkhel bul a ṭan thung.