Leverkusen 0 - 0 Hugo Lloris

Tottenham Hotspurs-in an goalkeeper Hugo Lloris khelh ṭhat zarah Bayer Leverkusen lakah goal an chhuah lo a, Germany-ah Mauricio Pochet-tino hoten point khat hlu tak an hlawh chhuak.

Group E hmahruaitu Mo-naco-in point thum an hmu bik lo a, Russia-ah Ligue 1 club hi CSKA Moscow nen 1-1 in an inhnehtawk. French club hian point nga hmuin group hmahruaitu an ni chhunzawm a; Tottenham (4 Pts), Leverkusen (3) leh CSKA (2) ten an dawt.

Lloris - Bang rinawm

Bayer Leverkusen hi Ger-man club ṭha ni mah se club lian tak an nih bik loh avangin Champions League leh Bundesliga khelh kawp an zo bik lo. Tunah hian league match vawi sarih khelh tawhah point 10 hmuin 10-naah an awm. Amaherawhchu Leverkusen hian Manchester United striker hlui Javier Hernandez an nei a, Chicharito hian kum hnih pawh tling loah German club tan hian goal 33 a khung tling der tawh.

Thawhlehni zan hian tun season bika goal sarih khung tawh Mexican striker Chicharito hian second half minute thumna lekah Stefan Kiessling cross chu goal-ah a chantir hmanah a ngai a, mah se Spurs keeper Lloris-a'n a dang hman. Goalline technology aṭanga thlir pawhin goal hian line a pel lo chiah chiah a, Mexican striker vanduaina hi Lloris-a ropuina a ni. Spurs keeper Lloris hian hemi hnu hian Charles Aranguiz leh Admir Mehmedi te goal khung tur a dan sak bawk.

Tottenham pawhin goal chance a nei ve tho a, Dele Alli-a'n first half-ah six yard lek a-
ṭanga a tauh luh loh bakah Vincent Janssen ball petin crossbar a per a, a let leh lam chu Erik Lamela-a'n goal-ah chantir tum nghal mah se Leverkusen keeper Bernd Leno-a'n a nem over hman.

A pawi lo

Tottenham manager Mau-ricio Pochettino chuan, "Inkhelh dan ka thlir khan lawm lohna tur awmin ka hre lo. Point hnih kan hlohah ka ngai lo a, point khat kan hlawh chhuakah ka ngai. Inkhel harsa tak a ni a, first half-ah khel ṭha zawk mah ila second half-ah erawh an khel
ṭha zawk a ni," tiin chak loh thei an nih thu a sawi.

Spurs goalkeeper Hugo Lloris chuan, "Vanneih a ngaih chang hi a awm a, ka vanneih ṭum a ni," tiin Chicharito goal khung tur a dang fuh chu a vannei tih a pha lo.

Inkhel dangah CSKA Mos-cow-in striker Lacina Traore (34') hmanga an hmahruaina chu hun tawp hma minute thum chiah a awm tawh tihin Monaco-in Bernardo Silva hmangin an sut. November 2, Nilaini zanah Thawhlehni zana inkhel te bawk hi an inkhel leh ang a, hemi hunah hi chuan Spurs-in Leverkusen hi an mikhual tawh ang. Chutiang bawk chuan Monaco-in Russian club CSKA an mikhual ang.