Bale-a'n goal khung ve ta

A hun laia khawvela player man to ber Gareth Bale chuan Real Madrid tan kum 2014 hnu lama a vawi khat nan Champions League-ah goal a khung. Zinedine Zidane-a naute hian Thawhlehni zan khan an mikhual Legia Warsaw chu 5-1 in an sawp a, Group F inkhel dangah Borussia Dortmund chuan Sporting Lisbon 2-1 in an hneh ve bawk.

Santiago Bernabeu Sta-dium-a inkhelah mikhual Polish club tan midfielder Vadis Odjidja Ofoe-a'n rin loh takin inkhel ṭan hnu lawkah goal bar a pet per! Real Madrid-in champion zia an chhuah zui a, Bale (16'), Marco Asensio (37'), Lucas Vazquez (37') leh Alvaro Morata (84') ten goal an khung a - defender Tomasz Jodlowiec chuan Marcelo ball pet chu an mahni lamah a ti lut palh bawk.

Warsaw tan midfielder Miroslav Radovic chuan penalty aṭangin khung ve mah se Champions League vawi khat khelhna Polish club mualpho tur a hliahkhuh zo lo. Team pahnihte hi November 2 khian Poland-ah an inkhel leh dawn a, inkhel entu an awm lo ang. Dortmund an mikhual ṭuma fan-te chet mawi loh vangin UEFA chuan Warsaw hi a hrem a ni.

Kum 27-a upa Bale hian Tottenham Hotspur aṭanga Real Madrid a zawm hnuah Europe-ah match 33 khel tawhin goal kua a khung tawh - season hmasa bik khan match riat a khelh aṭangin goal a khung miah lo. Kuminah erawh Cristiano Ronaldo leh Karim Benzema ten goal an khung loh niah a hunah tak a rawn rah chhuak.

Real manager Zidane chuan, "Goal nga kan khung tlin theih avangin ka lawm a, a chang chuan kan tlarhma leh tlarhnung kha in buk tawk lo deuh ṭhin mah se kan midfielder-te khan an hna an thawh ṭhat avangin kan buai phah lo," tiin a sawi. Zidane hian Ronaldo goal khung loh chu buaina tur a nih loh thu leh ani hi chuan goal khung tura a thawhrim reng thu a sawi.

Inkhel dangah Thomas Tuchel-a nauten league lama Bayer Leverkusen leh Hertha Berlin laka hnehna an chan zawh loh hnuah Sporting Lisbon 2-1 in an hneh. German club tan hian Pierre Emerick-Aubameyang leh Julian Weigl ten goal an khung a, Portuguese club goal neih chhun hi Cesar Zanaki khung a ni thung.